Sasaki – Diadomingo anochi pa mas o menos 11’or polis a bay cu urgencia ariba Sasaki, pa ta exacto den e area di Ex House Of Cheng.
Informacionnan cu a drenta tawata bisa cu auto a bolter y tin hende herida.
Departamento di trafico tambe a pura pa yega, y asina pone nan mes na altura di e accidente aki.
Mesora na nan yegada a laga cera rotonde Superfood bay nort y tambe a parti pabou banda di ex House of Cheng.
Esaki debi cu ambos banda tawata tin rastronan di e accidente. No tawata trata di solamente 1 auto cu a bolter sino 2. Debi na esaki palo di luz a wordo completamente ranca.
Esnan envolvi tawata levemente herida. Polis a wordo informa tambe cu un di e ocupantenan, aparentemente un chauffeur a bandona e sitio canando bay nort ariba Sasaki mes.
Polisnan a bay tira bista den e vecindario pero no ta logra topa cu e homber aki.
Loke a sosode segun un chauffeur
Segun chauffeur di e auto Honda Accord, e tawata bayendo nort probablemente duro y bou di su auto e tawata usando un spare tire.
Esaki segun su persona lo pone cu e auto a cuminsa perde control cu consecuencia ya menciona.
Patras di e Honda tawata biniendo un Mitsubishi Lancer, esaki tambe a perde control y bolter pa na final bay pega contra e palo di luz. Na e sitio nos a compronde cu e chauffeur aki ta esun cu a bandona sitio door di cana bay nort.
Polis di trafico a tene e caminda basta rato cera, pa por a haci nan investigacion.
Ambos vehiculo a wordo confisca y hiba warda di Balashi, unda lo haci investigacion ariba nan.