Dr. Horacio E. Oduber Hospital a eligi nan empleado di luna di februari y e biaha aki a scoge un nurse di departamento di Endoscopia. Coleganan y dokternan di “Endoscopy” a bini hunto pa sorprende Iraima Sophia cu a resulta empleado di luna februari 2019. Banda di su certificado pa e bunita reconocemento aki Iraima Sophia tambe a ricibi su gift certificate di AVC y weekend stay di Marriott regalo pa disfruta di dje.
Iraima semper ta pone e pashentnan na prome luga. Tur cos cu e ta haci ta pa e pashent sinti su mes mas comodo y ta haci esaki na un manera hopi cordial.
Iraima ta dispuesto pa yuda tur ora hasta ora cu tempo ta yega pa bay cas; e t’ey pa duna un man pa tur bay cas hunto. Ademas, e ta yega hopi trempan trabou.
Otro aspecto ta cu Iraima semper tin ideanan nobo pa haci cierto trabounan mas eficiente. Tambe con pa mehora e servicio pa e pashentnan.
Dokternan ta feliz di traha cu Iraima, dunando di conoce cu tur ta gusta traha cun’e pa motibo cu e ta percura pa tur cos bay bon. Tur cu tin e placer di traha cu Iraima ta sinti e pas y trankilidad cu e ta demostra durante su trabou.
Iraima Sophia ta significa inmensamente hopi p’e departamento di Endoscopia, asina Rachel Kraaijvanger, manager di Endoscopia di Dr. Horacio E. Oduber Hospital, a duna di conoce. E ta e nurse cu mas aña di servicio den e departamento aki. Como un nurse specialisa den endoscopia nan no por imagina e departamento sin Iraima.
E ta un colega cu nan por conta cun’e 100% pa 200%. E ta un colega flexibel, respetuoso y cariñoso cu su pashentnan y e tin hopi pasenshi. E ta un persona trankil, pasobra ni cu nan perde cabes riba e departamento Iraima semper sa di keda trankil. Esaki ta prome biaha cu e departamento di Endoscopia ta saca empleado di luna. “Nos ta hopi contento cu esaki”, Rachel Kraaijvanger a duna di conoce.
Pa Iraima tabata un sorpresa grandi di ta empleado di luna di Februari. E no a spera cu nan lo a nombre. Di a nombre pa ta empleado di luna tabata un honor pa su persona. Su carera como nurse a cuminsa unda e tabata traha riba piso pa 18 aña. El a duna di conoce cu despues el a scoge un reto nobo y a dicidi di sigui un carera nobo laborando na departamento di Endoscopia. Pa cu esaki ela specialisa y awendia e ta haci su trabou cu hopi placer. “Mi ta un hende cu gusta mi trabou masha hopi mes. Mi ta haci’e cu dedicacion y amor”, el a duna di conoce.
Pa Iraima e pashentnan semper ta na prome luga y ta considera nan parti di su famia.
Pabien Iraima cu e reconocimento bon mereci!
