ORANJESTAD – Turismo ta e pilar economico mas fuerte di pais Aruba y e ta tuma esfuerso di diferente instancia pa mantene esaki. Pa e motibo aki, Minister Dangui Oduber como mandatario encarga cu Turismo tabata tin un momento di gradicimento pa e board di Tourism Product Enhancement Fund (TPEF) pa e trabou cu nan ta bin ta desplegando.
E board actual di TPEF ta consisti di Joe Najjar, Astrid Muller, Mario Arends, Curtis Fraser, Joel Croes y Sjeidy Feliciano y Sharlyze Romano como Project Manager. E board ta responsabel pa maneha e fondo destina pa eleva e producto Aruba, haciendo nos isla mas atractivo y bunita pa turismo.
Durante e gradicimento aki, Minister Dangui Oduber a entrega un reconocemento special na sr. Joe Najjar, kende ta forma parti di TPEF desde su inicio na 2010 y ta fungi como chairman durante e ultimo añanan aki. E mandatario ta sumamente gradici pa e trabounan cu sr. Najjar a bin ta haci pa TPEF y pa Aruba en general.
Finalmente e mandatario a duna di conoce cu lo sigui riba e curso pa mehora e calidad di turista cu ta bin bishita Aruba y no tin duda cu TPEF ta hunga un rol importante den esaki.