Parlamentario Benny Sevinger recientemente a expresa su mes na forma masha baho contra esnan cu ta ilegal na Aruba. Se ñor Sevinger ta hopi bon na haltura cu e problema di ilegalidad ta algo cu Gobierno aki a hereda di e gobierno anterior. E falta di maneho bou di Benny Sevinger y Mike Eman a pone cu awor cu ta purbando pa trece orden den e desordo crea, inconsistencianan den nan maneho ta wordo presenta den cifranan.
Actualmente, Gabinite Wever-Croes tin un comision cu ta encarga pa haci analisis basa riba informacion concreto y legal presenta fo’i diferente departamentonan concerni.
E situacion interno na Venezuela tin un impacto grandi den region y nos isla tambe ta experenciando esaki. P’esey, Gabinite Wever-Croes no por acepta e ponecia di Benny Sevinger encuanto di e problema di ilegalidad y kico ta bay haci cu esaki.
E problema di ilegalidad no ta solamente e Venezolanonan cu lo por ta kedando atras, sino ta refleha e maneho inconsistente y incoherente di e gobierno anterior.
Manera anteriormente a ser informa, asina cu gobierno a haya sa di e certificadonan di UNHCR, a reuni cu ehecutivonan di UNHCR pa pone un paro inmediato na esaki. Awo, gobierno tin un comision ta trahando riba e problematica di asilo y a pidi ayudo tecnico specialisa temporario for di Hulanda, cual a ser otorga tambe.
Gobierno di Aruba ta haci un apelacion na Benny
Sevinger pa conhuntamente cu Gobierno, yuda informa e comunidad di e peso
y peliger relaciona cu hospeda y /of duna trabou na personnan ilegal. Specialmente promesanan falso pa trabou por ser considera den e ambito di traficacion di persona y abuso laboral.
Gobierno di Aruba, conhuntamente cu esfuersonan grandi haci pa departamentonan specialisa, a logra pa Aruba haya TIER 1 den su maneho pa combati traficacion di persona y abuso laboral y den cuadro di interes nacional, ta crucial pa esnan den Gobierno y Parlamento uni den e causa aki.
Esaki tambe ta conta pa personanan cu ta para garantia pa stranhero pasobra esaki ta un responsabilidad grandi cu lo por tin consecuencia financiero p’e persona.
Gabinete Wever-Croes ta spera di por conta cu apoyo di esnan den opisicion, si nan tambe tin Aruba na pecho, pa conhuntamente contribui pa evita ilegalidad , traficacion di persona y abuso laboral.