Parlamentario Endy Croes ta reacciona riba un conferencia di prensa cu Mike Eman a tene siman pasa 26 di februari. Pa casi un ora largo Mike Eman a bolbe manipula y sinta gaña pueblo pa purba trece un desbalance den comunidad. Awe nos lo bay riba algun parti y lo mester usa part # 2 y part # 3 etc pa asina splica y decifra Mike Eman su manipulacion. Promer cu tur cos Mike Eman ta sinonimo na HANANIAS. HANANIAS ta un profeta falso di acuerdo cu e scritura cu a indoctrina un pueblo cu mentiranan y manipulacionnan contra Rey di Babilonia siglonan pasa. Mike mester por a lesa e scritura aki y asina a scoge su modelo y e modelo di AVP pa hiba un politica atraves di mentira y manipulacion.
Manipulacion nunca bisto
Mike Eman a elabora entre otro riba e sentencia di hues contra Paul Croes di AVP. Segun Mike Eman textualmente: ”un veredicto cu ta pone logicamente henter nos comunidad y sigur nos institutonan politico tin cu bay haci un analisis profundo di con e partidonan politico ta opera, kico ta e vulnerabilidadnan cu tin den e sistema actual di financiamento di un partido politico y naturalmente e tragedia personal pa un famia.” Parlamentario Endy Croes ta haya personalmente cu Mike Eman ta un BURDUGO! Mike Eman kier haci como sifuera cu e sentencia (veredicto) di hues contra e ex minister di AVP Paul Croes tin di haber cu financiamento di partido politico. Esaki ta muestra grandi di MANIPULACION di marca mayor di Mike Eman. Absolutamente ningun momento so e caso aki di un ex minister di AVP tin nada di haber cu financiamanto di partido politico. Mas ainda e añanan cu a investiga Paul Croes ta 2015 y 2016 unda e tabata Minister y no tabata den ningun eleccion politico. Mike Eman no kier elabora pa nada riba e rekisitor di fiscal unda a splica na placa chikito cu prueba di combersacionnan graba y auto ful gewire kico tabata pasando. Tabata pone secretarianan yama castiga e comerciantenan pa donacionnan di caha di cervez y botter di whisky y tur tipo di maniobra a cambio di ontheffing pa nan haya un empleado. No ta manera cu a castiga e colonia Chines. Esaki Mike ta aproba?
Soborno y malversacion
Ora un comerciante ricibi un “negativo” di DPL, ta duna instruccion na su hendenan pa yama e comerciante pidie placa a cambio di lo regla esaki. Tabata soborna hende, a usa placa di Stichting pa paga “hoyas”, Creditcards, placa di prestamo di estudio cu e tabata debe, pone airco na cas y asina mucho mas. Pues tur locual tin skirbi aki riba ta den e sentencia di hues. Tambe a ricibi castigo pa malversacion y labamento di placa. Tambe a wordo proba cu tramitadornan Feliciana y Schwengle tabata paga Paul Croes. Den nan propio declaracion nan a declara esaki. Den nan administratie cu a haya na nan cas a comproba cu nan tabata paga Paul Croes dineral pa regla permiso y for di Filiciana so por a proba cu a duna Paul Afl. 80 mil florin. Tambe a prueba cu Paul a laba mas di 214 Mil florin. Esakinan ta para den e sentencia.
Politica manipulativo
Dicon Mike Eman enbes di splica pueblo e berdad awor kier hunga politica manipulativo como sifuera cu e caso tin di haber cu financiamento di partido politico? Foei Mike!! Den e di dos parti cu Mike Eman a splica cu esaki a resulta di ta un tragedia pa un famia. Mike ningun momento no a acudi na corte pa duna su sosten na e famia y Mike Eman tabata sa bon bon kico tabata pasando cu e famia. Mike Eman a manda Nicole Hoevertsz, su Secretaris dia 18 y 25 di augustus 2015 papia y confonta Paul cu locual ta pasando. Pues a laga Paul horca su mes enbes di a purba corigi’e anto awe Mike kier manipula pa gana simpatia atraves di sentimento di un famia. Nos tur sa cu tur pero tur famia cu pasa den un investigacion riguroso of den cualkier investigacion den man di husticia ta pasa tambe den un sufrimento. Esey nos no ta duda!! Na e manera cu Mike Eman kier usa esaki ta mustra atrobe su caracter manipulativo di un BURDUGO sin igual, Parlamentario Croes ta termina bisando. Lo continua cu part 2 y part 3.