Manera ta conoci proteccion di nos muchanan, bida digno pa nos muchanan, siguridad di nos criaturanan ta primordial pa Gobierno di Aruba y Minister Glenbert Croes. Locual cu a resulta e dia mas tristo den existencia di Pais Aruba, ta un suceso cu no ta permiti pa pasa mas. Pa e motibo aki cu a actua diligentemente y a trece henter e cadena social hunto cu awe a resulta den e Crisis Plan Social cu a drenta su fase di ehecucion.
Mientras cu na nivel di e cadena social pasonan fundamental ta tumando luga pa logra garantisa un siguridad y stabilidad social, Minister Glenbert Croes su team a bin ta organisa diferente actividad pa trece maske ta un chispa di alegria den bida diario di nos muchanan cu mester di atencion special.
Como pueblo, nos rutina diario di existencia por facilmente haci nos lubida e problemanan social cu nos pueblo ta bibando. Pero cifranan alarmante ta haci cu como Gobierno nos no por lubida.
Y mientras cu SCP ta den su ehecucion y nos ta brinda tur espacio pa por logra e maximo di e SCP, actividadnan manera e bishita recien na Scol Dornasol Kluster 4, e Bus di Alegria, Jump in Carnavalesco na Sonrisa y Trampolin pa Trabou, Joepi Camp den vakantie grandi….pa djis menciona algun, ta algun di e proyectonan cu Ministerio a bin ta organizando y tur cu e mesun meta, planta un simiya di alegria den curason di nos muchanan, ilumina e consciencia cu manera cu e situacion ta awe, no ta determina con bo bida lo ta mañan. Tur lo contrario. E cambio ta den nan propio man. “Nos lo keda organisa actividadnan di e indole aki pa for di un otro angulo complementa ehecucion di e Crisis Plan Social” tabata expresion di Minister Glenbert Croes.
Durante su actividad na scol Dornasol, e mandatario a haya e pregunta for di un di e studiantenan di kico ta locual cu mas e ta gusta di su trabou. Minister Glenbert Croes su contesta tabata: “loke cu mas mi ta gusta di mi trabou ta cu un solo decision por impacta e bida di hopi hende”. Esaki na mes momento ta trece e responsabilidad y consciencia cu ne cu e impacto cu como Gobierno nos kier laga atras ta uno cu lo trece e cambio necesario pa bienestar y felicidad di nos pueblo cu lo perdura pa largo.