Scol Basico Laura Wernet-Paskel ta haya airco
Den apenas algun siman cu Scol Basico Laura Wernet-Paskel a haya bishita di Minister Dangui Oduber, Parlamentarionan Hendrik Tevreden y Edgard Vrolijk, a inicia e proceso pa pega airco, dunando alivio na un problema grandi cu e scol tabata tin. Pa Parlamentario Hendrik Tevreden, esaki ta un muestra di ‘cu ora tin boluntad, situacionnan ta mehora’.
Parlamentario Tevreden ta splica cu Colegio Laura Wernet Paskel ta bira un di e prome scolnan cu lo conoce airco y sistema di coriente nobo. Esaki lo yuda nan den diferente forma.
1. Limita zonido cu ta kita concentracion di muchanan
2. Por uza sistema digital cu mas facilidad
3. Clima agradabel cu ta yuda e muchanan concentra miho
Mas leu e Parlamentario ta bisa cu e proyecto “Adopta un scol pa airco”, ta un proyecto cu a nace for di preocupacion di parlamentario Edgard Vrolijk y su persona. Nan a mira e necesidad pa yuda e futuro generacion, pa asina por logra cu nan ta presta mas atencion den nan ratonan na scol. “Awe airco no ta un luho mas sino un necesidad den nos clima cu a mira hopi cambio ultimo añanan”, Parlamentario Hendrik Tevreden a expresa.
Como Parlamentario e ta consciente cu gobierno no tin tur fondo necesario y p’esey mester busca tur manera pa NV-nan gubernamental y tambe comercio yega na adopta un scol cu falta airco. Un factor cu ta hunga un rol grandi ta e hecho cu nos scolnan ta di 20 of mas aña bieu y e tempo ey nan no a wordo instala pa carga 10 pa 12 airco. E gastonan di electricidad ta esnan mas halto den e proyecto aki. E intencion ta pa e scolnan haya un instalacion di coriente moderno y percura pa asina uza esaki tambe pa e sistemanan digital di borchi cu ta wordo usa awendia.
“Colega parlamentario Edgard Vrolijk ta e motor principal tras di e proyecto aki, y mi ta dun’e su merito y lucha hunto cu ne, pasobra nos tur dos ta consciente y testigo cu estudio por yuda nos muchanan yega hopi leu den bida”, Parlamentario Tevreden ta expresa. Igualmente e Parlamentario ta gradici Minister Dangui Oduber, kende a haci su maximo esfuerso pa airconan pa e prome scol bira realidad y den un tempo record.
Finalmente e ta splica cu e ta di opinion cu falta hopi mas pa tuma luga y ta confia cu Gobierno lo percura pa atende tur tema di enseñansa cu falta atencion. Hendrik Tevreden: “No ta kita cu for di Parlamento nos tambe ta purba na contribui.”