Turismo di Aruba ta pasando den su mihor momentonan den historia di nos pais. Minister Dangui Oduber ta sumamamente contento y satisfecho cu e resultadonan y sigur esaki ta yuda fortalece y sigui stimula nos economia.
Den luna di januari 2019 hotelnan na Aruba a sold out. Tur e indicadornan hotelero tabata positivo y ta confirma cu e maneho di Minister Dangui Oduber ta dunando resultado. Manera ta conoci e maneho di Minister Oduber ta dirgi riba turistanan di calidad y turistanan cu tin un spending capacity hopi halto.
Den luna di januari e grado di ocupacion tabata 89.5% y cu esaki un grado di ocupacion mas halto den henter Caribe. Banda di e grado di ocupacion e REV PAR den luna di januari a conoce un crecemento di 7.8% den comparacion cu luna di januari 2018. E REV PAR den januario 2019 tawata $314.85. E REV PAR ta un indicador sumamente imporatante pa midi e calidad di turistanan cu ta bin Aruba. E REV PAR ta e prijs cu un turista ta dispuesto pa paga pa un camber pa anochi. Nos como pais mester ta contento cu e hecho cu nos tin un di e REV PAR mas halto den Caribe. Na momento cu bo tin un REV PAR asina halto e ta bisto cu turistanan di calidad ta yegando nos pais. E maneho di Minister Oduber a wordo demostra cu e ta dunando resultado, treciendo e turistanan cu ta laga mas placa den nos economia.
Otro indicador hopi importante ta e ADR (average daily rate) cu tambe a conoce un aumento di 7%. E average daily rate den luna di januari ta $351.98.
E resultadonan di luna di januari ta confirma cu Aruba su Turismo ta sigui crece y sigui desaroya cu bishitantenan nobo y contrario na e rapport di Banco Central nos ta hopi leu di stagnacion. Minister Oduber ta lamenta cu Banco Central ta publica un rapport asina comosifuera Aruba su Turismo a stagna. E cifranan mes ta papia pa nan mes y e Mandatario ta convenci cu Banco Central tambe lo tuma nota di e crecemento den nos Turismo.
Minister Dangui Oduber kier a gradici tur e empleadonan den Turismo, tur e stakeholdersnan cu un resultado asina bunita pa e promer luna di anja 2019.
Aruba ta keda un perla den Caribe, nos Turismo ta keda nos unico pilar y driver economico y pesey nos tur mester percura pa nos manetene nos calidad y nivel di servicio. Envez cu nos purba cuestiona y critica nos Turismo nos mester yuda fortalece.