Desaroyo di proyecto hotelero na San Nicolas ta hopi positivo y lo crea un spin off effect pariba di brug. Alan Howell, Parlamentario di POR a duna di conoce cu e personalmente ta hopi contento di scucha for di Ministernan Dangui Oduber y Otmar Oduber e splicacion riba e desaroyo nobo pa loke ta trata economia pa San Nicolas, cual lo ta uno hopi positivo.
E parlametario a indica cu e dos ministernan a splica den detaye con e proyecto hotelero aki ta bay ta hinca den otro. Tambe e ta bisa cu hopi hende ainda no ta kere cu e proyecto aki ta bin pasobra na varios ocasion a priminti hopi cosnan pa San Nicolas cu no a bin y tambe cada biaha tabata scucha hopi grito en contra como si fuera cu San Nicolas no merece di haya algo.
Tambe el a bisa cu tin un discusion riba cu lo tabata miho pa bin cu un boutique hotel pariba di brug, “kisas esey por ta berdad, pero realidad ta cu ningun persona a yega na gobierno pa mustra nan interes pa traha un boutique hotel na San Nicolas. E oportunidad aki a presenta y mi ta contento cu gobierno ta gare cu dos man y brasa habri pa asina for once and for all, Aruba lo por haya un hotel di taya pariba di brug. E ta all inclusive, pero miho nos tin algo cu nada. Pa añanan San Nicolas no tabatin nada, pa añanan nos di pariba di brug y otronan a grita cu pariba di brug ta un ghost town y mi ta mirando cu e gobierno aki pa e poco tempo cu nan ta den gobierno ta concentrando grandemente riba e desaroyo di pariba di brug”.
Howell ta agrega cu ohala cu Dios su poder tur cos por cana bon pa e hotel aki bira un realidad, pasobra pa hopi añanan e gritonan tabatey pa San Nicolas haya un boost economicamente y e hotel aki lo alivia bastante ciudadano di pariba di brug. 25% di e salario di esnan di pariba di brug cu ta traha den sector hotelero ta bay pa transporte solamente, ademas e tempo cu nan tin pa nan famia ta bira menos debi na e distancia y door di esaki e ta supone cu hopi di nan lo desea di traha pariba di brug mes.
Un otro punto positivo cu Howell ta menciona ta cu na momento cu tin actividad economico, esaki ta stimula otro tipo di actividadnan y comerciantenan lo cuminsa inverti den diferente negoshi na San Nicolas.
Tambe lo yuda pa e muchanan cu caba EPB y EPI por haya trabou, fuera di otro spin off effect cu e hotel lo por trece, manera por ehempel restaurantnan.
Relaciona cu Baby Beach, Alan Howell a bisa cu e como parlamentario lo percura pa desaroyo di e hotel aki no afecta e area di Baby Beach den sentido cu lo por stroba nos propio ciudadanonan pa bishita e beach aki.
Fraccion di POR y sigur Alan Howell tanten cu tur e rapportnan ta cana como debe ser, tanten cu tur cos ta cana bon, lo sostene gobierno pa cu e proyecto aki y e ta spera cu poder di Dios cu e proyecto aki no lo bira e unico pa San Nicolas.
“Mi ta kere esaki ta e momento cu San Nicolas mester haya su fair share bek, manera e cantica di Claudius Philips ta bisa, San Nicolas is a part of Aruba too y cu Alan Howell de Parlamento pueblo di Aruba, nos ciudadanonan di pariba di brug por conta cu despues di e 4 añanan di e gobernacion aki mi mision y vision ta pa mira un diferencia no solamente na nos pais Aruba, pero sigur, sigur na pariba di brug y entre otro San Nicolas”, Alan Howell a finalisa bisando.