Yara/Savaneta: Diadomingo den oranan di mainta ta sosode un accidente serio na Yara, caminda un ciclista ta dal hopi duro tras di e auto su dilanti y ta keda seriamente herida. Mesora ta manda polis y ambulance na e sitio.
Na yega nan ta bin topa cu e ciclista seriamente herida, cu fracturanan serio na pols y na rudia te cu su weso tabata visibel, tambe ela haya hopi sla na cabes.
Segun e chauffeur di e BYD blanco a splica polis, cu e tabata biniendo di pariba, ela brake pa bay lora y na momento cu e tabata wardando dos auto pasa pa e por lora, e ta mira e ciclista ta bin patras cu velocidad halto y pa un motibo of otro no a brake na tempo y a dal hopi duro patras di su auto. E impacto tabata asina fuerte cu ela kibra e glas di patras di e auto y e bicicleta a keda parti den dos.
Cu hopi urgencia personal di ambulance a transporta e victima pa hospital, su situacion ta serio y a pidi pa presencia di departamento tecnico di polis na e sitio.