Home Politics SECTOR PRIVA TAMBE MESTER ASUMI SU RESPONSABILIDAD DEN COMBATIMENTO DI CORUPCION

SECTOR PRIVA TAMBE MESTER ASUMI SU RESPONSABILIDAD DEN COMBATIMENTO DI CORUPCION

SHARE

 

Recientemente Minister Plenipotenciario na Washington DC a atende un dialogo organisa pa e organizacion “The Dialogue” cu a carga e tema: “Corruption Prosecutions in the Americas: A Comparative Analysis”.  Miembronan di panel tawata: Rodrigo Janot, ex procurador general di Brasil, Jose Ugaz, abogado na Peru y presidente di transparencia internacional, Claudia Paz, y ex procurador general di Guatemala y Kevin Gingras, ex abogado di Corupcion International pa US Department of Justice.

 

Presidente di Inter-American Development Bank, Sr. Michael Shifter, a habri e session bisando cu unda cu tin corupcion no tin desaroyo. E la sigui bisa cu na Latino America tin dos tipo di corupcion: (a) corupcion di “petty cash”  cu ta corupcion administrativo, loke na Aruba nos ta cualifica como tuma placa of regaldo pa fabornan politico of haya favoritismo den ilicitacion a cambio di beneficionan y (b) “grand corruption” cu ta abuso di poder na alto nivel a costa di derechonan humano di bo país y bo comunidad henter.   

 

Ugaz ta comenta cu corupcion den Latino America ta un probema sistematico y structural

Argentina, Brazil, Peru, Venezuela, Colombia y Uruguay tawatin presidentenan of alto funcionarionan cu a wordo persigui pa corupcion pero no tur caso tin un resultado exitoso. E casonan di Lava Jato, Odebrecht, Fujimori Montesinos, Dólar del Futuro, Lord Rolls Royce ta algun di e casonan di mas grandi y mas conoci contra corupcion den Latino America.

E compania Odebrecht pa medio di soborno di casi 788 millon dollar a logra haya mayoria di e contratonan di obra publico den 11 pais den Latino America.

 

Riba e pregunta pakico algun caso di investigacion ta exitoso y pakico algun no ta exitoso of pakico algun caso no ta ni tuma luga, tur cuater panelista a bisa cu e ta depende di varios factor pero esunan di mas importante ta: cu e ta depende si e pais tin trias poilitica (separashon di poder), si tin boluntad politico pa persigui mandatarionan of alto functionarionan of comerciantenan corupto, si e ley di e pais ta permiti  pa nan wordo persigui of si e personanan aki tin impunidad, si e fiscalia y huesnan ta independiente y nan tin nan mesun presupuesto independiente y e experticio y capacidad pa hasi investigacionan grandi y si e país por conta cu ayudo internacional pa datanan y experticio. E exito den e caso Odebrecht tawata e ayudo di Suisa pa a entrega tur e datanan bancario di mas di 1000 sospechoso pero tambe e ayudo di expertonan pa compila y analisa tur e datanan y auditoria.  Tambe tecnologia avansa di awo a yuda e paisnan y fiscalia masha hopi mes cu nan investigacionnan. Otro cos cu a yuda Guatemala hopi den su combatimento di corupcion ta nan reforma normativo y legal. Nan a introduci castigonan mas severo pa corupcion y fraude y nan a ratifica e “anti-corruption treaty”, nan a haci tapping posibel, nan a independisa e presupuesto di fiscalia y e huesnan y nan a cuminsa uza companianan independiente di gobierno pa haci auditoria.

 

Mayoria di e corupcion ta sosode ora tin licitacionnan no transparante, ora cu e cuerpo di aduana di e pais ta corupto y ora bo fiscalia y huesnan tin miedo of tambe ta corupto y si e pueblo y comercio ta  acepta “white color crime” como algo normal y no ta consider’e un crimen.

 

Paz a enfatisa cu no ta paso e ta un costumber pa regala of duna placa na gobernantenan of alto functionarionan esaki ta hacie aceptabel of legal. P’esey e ta di opinion cu e defensa cu varios comerciante a uza den corte durante e varios casonan aki, cu si nan no paga e soborno of duna placa na e gobernante e ora nan no ta haya e proyecto, y p’esey nan ta haya nan mes obliga di haci nan mes culpabel na corupcion, ta uno baho y sin base. E ta di opinion cu e comerciante mester sa cu esaki no ta bon y ta contra ley y cu nan tin cu carga nan responsabilidad pa pone un paro na corupcion y pa entrega keho contra esaki y no pa tambe bira complice.