Durante conferencia di prensa ultimo, Parlamentario Sue-Ann Ras a trece dilanti, cu den transcurso di hopi aña nos por wak, cu a no a duna atencion debido, sostenibel y responsabel pa loke ta trata enseñansa na Aruba, a pesar cu nos tin diferente stakeholder den enseñansa. E resultado final ta un deficiencia completo den diferente area di enseñansa y mirando tur e desaroyonan cu tin den enseñansa ultimamente, unda cu tin varios trabou pa ehecuta, kisas un posibel solucion por ta un Conseho di Enseñansa (Onderwijsraad), manera cu tin na Hulanda tambe for di 1919.
CONSEHO DI ENSEÑANSA
Cada biaha cu cambia di Minister di Enseñansa, ta cambia tambe e direccion y maneho di enseñansa y cu tur su consecuencianan. “Enseñansa ta keda wes’i lomba di desaroyo di un pais y ta importante pa tin un supervision di un Conseho di Enseñansa, cu lo fungi completamente independiente di Minister di Enseñansa y Parlamento. Pues Conseho di Enseñansa tin e rol pa duna conseho, sea cu puntra of no puntra, tocante e lineanan principal di maneho y legislacion riba tur area relaciona cu enseñansa,” Ras a cuminsa na splica. Nos tin varios stakeholders den enseñansa, sinembargo no por descarta si, cu cada minister di enseñansa ta bin cu un maneho diferente, di cual tin influencia total riba continuidad den maneho nacional di structura di enseñansa y mas principal, independiente di gobierno.
FORMA DI TRAHA
Segun Ras cu un instituo asina Aruba por beneficia di un mihor structura riba termino largo di enseñansa, unda cu por tin garantia cu educacion ta keda un actividad inherente na desaroyo di e ser humano. Por ehempel nos ta den proceso awor di renobacion di nos curiculo, den relacion cu un contribucion duradero riba calidad di enseñansa. E Conseho di Enseñansa lo por duna su conseho cu ta importante cu riba nivel di diferente tipo di enseñansa, ta involucra varios grupo, pa pensa riba e tarea di enseñansa y e rol di e diferente materianan y tereno di materia cu cada un lo hunga. E Conseho di Enseñansa lo vigila y duna conseho riba con e diferente procesonan aki ta cana y cu ta importante pa e curiculo ta keda den conexion cu e desaroyonan di e sociedad. Pues lo percura pa keda cuida y protega e relacion di materia, contenido, meta, ley, subsidio, etc. dentro di tur e sectornan di enseñansa. “E forma con Conseho di Enseñansa ta basa su consehonan riba e topiconan relaciona cu loke tin poni fiho den un programa di trabou anual di Minister di Enseñansa y na mesun momento den e presupuesto fiho di Reino, cu ta keda presenta na 1ste y 2de Kamer. Nan tin oportunidad di haci pregunta of agrega conseho na e programa di trabou di Minister, tanto riba maneho di enseñansa como enseñansa,” Ras a finalisa bisando.