Diaranson siman pasa Minister di Turismo sr.Dangui Oduber hunto cu colega Minister di Finansas sra. Xiomara Ruiz-Maduro y CEO di ATA a firma un MOU cu e plataforma di Airbnb.
Airbnb ta un website unda un turista por huur un cas of un camber den un cas. E idea di Airbnb ta pa e turista haya un experencia local. E plataforma aki ya ta uno conoci caba aki na Aruba, pero den pasado nunca a haci contribucion na e caha di gobierno. Pa e motibo aki e MOU firma ta sumamente importante, cu e MOU aki Airbnb ta bira e prome plataforma cu lo contribui na e “Tourism Levy”, algo historico segun Minister Dangui Oduber.
Airbnb ta bira e prome pa contribui na e caha di gobierno pero e idea ta pa den futuro e otro plataformanan manera Expedia, Kayak, Bookings etcetera tambe contribui na esaki. Minister Dangui Oduber a expresa di ta contento di por a firma e acuerdo di cooperacion aki. E importancia den e acuerdo aki ta cu e ta crea un level playing field den nos turismo.