Recientemente a tuma lugar den sala di comision di Parlamento un reunion entre Directiva di Stichting EPB (SEPB), director suplente di EPB y Comision fiho di Enseñanza na cual Parlamentario Tromp-Lee ta forma parti.
E reunion a cuminsa cu un presentacion di sra. Bosma cu ta e Director suplente di Stichting EPB caminda el a duna informacion di e organisacion di SEPB, tocante e enseñanza di EPB y e resultadonan di cada unit. Tambe a trata e aspectonan fuerte di SEPB y kico ta e retonan cu e scol tin pa atende cu nan. SEPB ta un scol grandi caminda na Oranjestad tin 1000 studiante y na San Nicolas tin 600 studiante.
Un aspecto di preocupacion cu sigur a keda atendi ta e 7,1% di dropouts cu e scol tabatin den e aña escolar 2017-2018. Mirando cu e motibonan cu a conduci na e dropout ta conoci ta haci posibel cu por atende cu nan na un manera dirigi y structura. Pero na mes momento ta enfatisa e realidad cu hopi biaha sa kico ta e problema pero pa falta di suficiente recurso humano y un infrastructura di cuido limita, ta haci cu no por atende cu e motibonan manera ta desea y adecuadamente. Ta remarcabel cu no obstante esaki SEPB ta atende cu e punto aki na diferente manera pero tin aspecto cu difícilmente nan por contraaresta manera situacion financiero di e famianan, problemanan social etc.
Durante e presentacion tambe a keda presenta e aspectonan fuerte di e scol manera nan cuerpo di docente experiencia, nan unitnan “scol chikito den scol grandi”, nan propio material di les desaroya pa e docentenan di EPB, resultadonan positivo di muchanan cu ta caba scol, e sistema di educacion practica-teoria y actitud profesional y asina por sigui menciona.
A para keto na e e diferente retonan cu SEPB tin pa atende cu nan. Uno cu Parlamentario Tromp-Lee a mustra hopi interes den dje ta e ‘aansluiting’ di SPO y basisschool na EPB y con ta bay percura pa mas mucha di SPO por drenta EPB y logra caba nivel 1 y preferiblemente tambe nivel 2. Akinan sigur e materia Hulandes ta bay keda un problema. Mirando e posibilidad cu ariba mercado laboral e chens ta practicamente nulo pa loke ta trata uzo di Hulandes den e funcionnan cu e graduadonan aki ta bay ehecuta, pregunta ta si ta necesario mantene e materia Hulandes den nan curiculo.
Otro aspecto cu Parlamentario Tromp-Lee a trata cu SEPB ta e ‘aansluiting’ entre e graduadonan di EPB y mercado laboral. Y cu e ta di opinion cu mester crea un mihor ‘matching’ entre e necesidad y oferta, sigur pa loke ta trata e ‘lagere beroepsfuncties’. Si analisa e cantidad grandi di importacion di trahador pa ehecuta e tipo di funcionnan aki y e grado di desempleo bao di nos hobennan sigur ta un punto cu mester haya su atencion.
Por ultimo, no obstante e echo cu tempo no a duna e oportunidad pa atende e siguiente punto cu SEPB, Tromp-Lee ta remarca cu otro punto di atencion ta e ‘aansluiting’ di EPB na EPI y e cantidad di studiantenan cu finalmente ta logra finalisa EPI exitosamente. Un punto cu ta bon pa tin e data necesario pa por percura pa mehoracion den esaki, mirando cu tin señalnan cu tin espacio pa mehoracion. Si tin data por analisa kico ta e problema y con por atende cu ne.
Tromp-Lee ta finalisa bisando cu e reunion a bay hopi bon y cu ta na su lugar pa mantene e contacto cu SEPB y invita nan mas structuralmente den e comision fiho di Enseñanza.
