ORANJESTAD, Aruba –  Actividadnan di Carnaval 65 ta sigui y e biaha aki a tuma luga e eleccion di Reina Infantil y Hubenil. Un publico grandi tabata presente den Carnival Harbour Arena, unda cu tur presente a apoya nan participante preferi. Den un bon ambiente tur hende tabata den suspenso wardando pa mira kendenan lo bira reinanan di Carnaval 65.
E anochi a cuminsa cu baile di e participantenan, kendenan a mustra nan trahe carnavalesco. Den categoria infantil a participa 5 mucha kendenan tabata Yirelda Henriquez di Don Flip Carnival Group, Alyxienne Kock di TOB Kids, Aliyah Harms di Champagne Kids, Evy-Camila van der Biezen di EZ Party Solutions/Mini Royal y Daniella Isabella Owekerk di Noord. Den e categoria hubenil tabatin 4 participante, kendenan tabata Delany Wever di Champagne Carnival Group, Ashantee Martus di TOB Carnival Group, Ilaijah Croes di Dushi Carnival Group y Annais Thiel di Colegio San Antonio.
Cada participante a duna speechnan bunita cu mensahe carnavalesco pa tur hende. Un biaha mas participantenan a duna un tremendo presentacion, unda tur hende tabata aplaudi p’e candidatonan. E huradonan presente tabatin un trabou dificil pa por a saca e reina infantil y hubenil, unda a scoge Aliyah Harms di Champagne Kids como reina infantil y Ilaijah Croes di Dushi Carnival Group como reina hubenil di Carnaval 65.
Representante di Aruba Bank, Roxanne Croes, a entrega regalonan na e ganadonan di Reina Infantil y Hubenil di Carnaval 65. Aruba Bank ta felicita tur participante y ta invita bo pa celebra un Experiencia Superior durante Carnaval 65. Nos ta Carnaval!