ORANJESTAD – Actualmente, Aruba ta den e temporada halto pa loke ta trata turismo crucero. Esey ta notabel specialmente ora tin mas cu tres barco crucero grandi mara na waf di Oranjestad simultaneamente.
Ademas di e bienestar economico, e volumen halto di turista ta trece cu n’e tambe mas trafico di persona, specialmente den centro di ciudad.
Pa tal motibo, Aruba Tourism Authority ta informa comunidad en general, cu diabierna dia 25 di januari binidero Aruba lo haya bishita di tres barco cu lo trece un total di 14.110 bishitante pa nos isla.
Nan ta ‘Freedom of the Seas’ di Royal Caribbean Cruise Lines cu un total di 5.875 bishitante, ‘Divina’ di MSC Cruises cu 4.890 bishitante y por ultimo ‘Disney Wonder’ di Disney Cruise Line cu 3.345 bishitante.
Apesar cu ta un dia liber, ta informa pa asina tene cuenta cu bishita di 3 barco por causa trafico en general mas slow cu normal. Maske cu ta un dia oficialmente liber, negoshinan cu ta desea lo por ta habri e dia aki. Esaki ta un oportunidad pa nos comunidad tambe haci nan compras.
Aña pasa, Aruba a yama bonbini na diferente crucero cu a bishita nos destinacion pa prome biaha, entre otro Carnival Horizon, Freedom of the Seas, Viking Star, Aida Perla, Celebrity Silhouette etc. Aki por mira cu mayoria di e barconan cu ta bishita nos isla ta e asina yama ‘mega cruiseships’, cual ta barconan cu ta creciendo den capacidad pa cu cantidad di pasahero.
Importante pa menciona ta cu durante un estudio di midi diferente aspecto di crucero, a indica cu tawatin un crecemento di 8.8% di loke e turista crucero ta gasta den averahe durante nan estadia na nos isla.
E otro parti ta e impacto economico cu e turistanan aki ta laga atras, cu pa 2019 esaki ta proyecta di ta minimo US$ 85.5 miyon.
Aruba Tourism Authority ta invita comunidad pa yama nos bishitantenan un caluroso bonbini, compartiendo cu nan sigur e hecho cu nan ta di bishita riba un dia special pa Aruba, esta Dia di Betico. Alabes ta pidi comprension di parti di tur ciudadano pa cu posibel congestion den centro di ciudad. Ta desea comunidad completo un Feliz Dia di Betico.