Durante IPKO siman pasa e cuater delegacionnan a yega na palabracion cu cada pais lo haci algun pregunta specifico na nan gobierno. Esaki por cierto riba insistencia di Aruba, Corsow y Sint Maarten.
PALABRACION DURANTE IPKO
Ta asina cu e delegacion Hulandes a duna di conoce cu nan ta haya cu ayudo na e islanan Caribense di Reino, pa cu e situacion di Venezuela ta na su lugar. Sinembargo ta necesario pa haya sa exactamente kiko e ayudo aki ta encera. Y den cuadro di esaki, apesar cu cada pais den Reino tin basta tempo debatiendo riba e tematica aki, a palabra cu lo haci cierto pregunta na nan gobierno.
PREGUNTANAN POR ESCRITO
17 di januari sr. Rocco Tjon, kende ta presidi e comishon di asuntonan di Reino den Parlamento, a manda haci e preguntanan, cual a palabra durante IPKO na prome Minister sra. Evelyn Wever-Croes.
E preguntanan ta ensera pa (1) mas lihe posibel Parlamento ricibi tur data relevante pa e tematica aki, (2) Parlamento haya un raportahe di e trabounan haci pa e comishon cu ta atende e problematica di Venezuela, (3) haya sa mas lihe posibel e punto di salida di Gobierno di Reino pa loke ta incorpora Aruba den e programa di Eurolat, cual ta brinda ayudo financiero na paisnan cu ta wordo afecta pa e problematica na Venezuela y (4) haya sa cua parti di e plan cu gobierno tin pa atende cu e problematica mester conta cu ayudo di Gobierno di Reino.
PA CONCLUI
Apesar cu Parlamento y Gobierno a duna hopi atencion na e desaroyo na Venezuela pa mitiga posibel implicacionnan pa Aruba, ta spera cu aworaki Hulanda por fiha un posicion claro pa asina trece claridad pa e pueblonan di Aruba, Corsow y Sint Maarten.
Riba e potret cu ta acompaña e articulo aki por mira e preguntanan cu a wordo haci.
