E reunion tabata sumamente productivo y e grupo a discuti diferente proyecto comun.
Recientemente a tuma un luga un reunion entre Ministerio di Sector Primario, Departamento di Agricultura, Cria y Pesca/Santa Rosa y e organisacion United Farmers Aruba (UFA). E organisacion aki ta consisti di mas di 25 miembro cual ta involvi den diferente proyecto di produccion di berdura, fruta produciendo asina diferente productonan pa bende localmente.
For di nan inicio na 2018 UFA a tene diferente encuentro, entre otro cu, Minister Chris Romero, representantenan di Santa Rosa, y otro departamentonan gubernamental y priva. E meta di e reunionnan tabata pa sondea diferente posibilidad pa un mihor desaroyo di un agricultura sostenibel y innovativo pa nos isla. Minister Chris Romero, como e mandatario encarga cu e cartera di Sector Primario, ta articulando diferente comision cu lo percura pa yega na e implementacion di un plan di maneho na termino corto y largo pa asina sostene e demanda y necesidad di nos productornan local.
E resultadonan preliminar di e reunionnan cu a tene te ainda ta duna diferente idea y proyecto interesante y beneficioso pa nos Sector Primario, cual lo wordo planifica durante e prome mitar di aña, cu e meta pa keda ehecuta den e di 3 y 4 kwartal di 2019. E diferente puntonan urgente di atencion cu a keda discuti tabata, entre otro, e implementacion di un programa di certificacion di calidad, un proyecto PPP entre Ministerio di Sector Primario, Santa Rosa, UFA y instancianan priva, cu ta encera un plan integral y structural pa recoleccion di awa di yobida y otro awanan recicla. Como tambe ROP y su impacto riba e areanan di plantacion, incentivonan fiscal y otro sistemanan di permiso pa Sector Primario.
E siguiente paso pa sigui lo ta e planificacion di e proyecto PPP y implementacion di un calender di actividad pa por sigui sostene y concientisa Aruba su Sector Primario.
Esnan presente na e reunion tabata sr. Eumar Koolman, Consehero encarga cu Sector Primario di Minister Romero, Directora pa Santa Rosa, sra. Nathalie Maduro, representantenan di United Farmers den persona di sr. Gregory Fung-A-Fat, sr. Dan Barros, sr. Thomas Goushaw y sr. Freddy Vargas.
