Nos tin un ley di Landsverordening Ruimtelijke Ontwikkeling (LRO) cu ta duna Gobierno espacio y instrumento pa traha un concepto di un plan. 10 aña pasa a introduci e plan di desaroyo teritorial cual su valides ta terminando pronto. Consecuentemente mester traha un plan nobo pa e siguiente 10 añanan. E proceso aki a inicia algun tempo pasa, pa cual actualmente tin e plan di desaroyo teritorial ‘ter inzage’ pa tur hende por pasa y wak con nos por diseña nos Pais. Awor publico por duna nan idea (por escrito) di locual nan ta opina di e plan. Despues di e periodo di inzage cu ta 4 siman, lo sigui un otro luna di ‘zienswijze’ unda cu comunidad por sigui duna nan opinion y idea riba e plan. Despues di e periodo aki lo tin un luna mas unda cu lo tuma na consideracion tur informacion ricibi. A base di tur informacion cu a ricibi lo adapta e plan pa eora na luna di mei por tin un plan di desaroyo teritorial nobo pa e proximo 10 añanan unda cu lo por mira con lo diseña Aruba, director di Directie Insfrastructuur en Planning, Haime Croes a splica.
‘E oportunidad pa mira e plan aki y duna opinion riba dje ta conta pa tur hende, pasobra e plan ta un vision cu Gobierno ta pone pa e proximo 10 añanan. E ta encera con lo bay stipula unda lo construi, unda ta pa naturalesa y unta ta proteha.’
A tuma un plan den cual ta sali for di e punto di bista cu e futuro di Aruba mester ta uno sostenibel teniendo
- Desaroyo economico
- Desaroyo social
- Desaroyo di naturalesa y medio ambiente
Cada aspecto mester ta den balansa cu otro, sr. Croes ta enfatisa! Idea ta despues bay profundo den e aspecto di desaroyo manera enfocando riba un pida tereno chikito, pa determina kico por y no por den cada bario. Por ehempel: con grandi lo por construi y con halto lo por bay cu construccion.
Concluyendo sr. Croes a bisa cu ta importante pa tur hende ta consciente cu tincu proteha Aruba di desaroyonan cu ta pone nos naturalesa bou presion. Cual tambe ta motibonan cu ta necesario pa proteha nos Pais. Si nos tur sa kico e plan di desaroyo teritorial ta encera pa Aruba, nos por bira mas consciente di locual cu ta desaroya y kico no.
Ta invita henter comunidad pa haci uzo di e tempo duna pa revisa y opina riba e ROP. Por haci esaki pasando na oficina di DIP, tur MFA y Biblioteca Nacional. Tambe por ricibi e informacion, revisa y opina online, riba via http://www.aruba-ro.nl y www.dip.aw