Pa hopi tempo mi deseo ta pa nos drecha y mantene Alto Vista y e area rond di dje. Alabes mi ta haya necesario pa bin cu un maneho nacional pa por garantisa cu e ta keda un sitio di trankilidad, paz y unda cu localnan ta bay pa reza y busca paz interno. Na mes momento mi ta realisa cu e ta un sitio hopi bishita pa nos turistanan, cual ta haci necesario pa crea e balansa y percura pa e respet pa nos Kapel di Alto Vista.
Pa e motibo aki mes mi a acerca Minister Dangui Oduber dia 22 di juni 2018 pa presente mi idea encuanto nos Kapel di Alto Vista. Minister a hay’e un tremendo idea y a keda di bay wak si tin fondonan disponibel pa cuminsa concretis’e.
Dia 29 di oktober 2018 mi a reuni cu Minister caminda el a indica cu lo por cuminsa realisa e idea parcialmente y cu lo por cuminsa drecha e borchinan di oracion cu ta poni na e stashinan.
Dia 2 di november 2018 mi a percura pa manda e potretnan necesario di e situacion, esta cuanto borchi y nan localidad.
Mirando cu Alto Vista ta cay bao Parokia di Noord y cu a keda indica door di Minister cu tin e fondonan necesario pa pone pilar y borchinan di oracion nobo, hunto cu mi querida Mama, mi a reuni dia 5 di november 2018 cu Pastor Santiago y sr. Jose Figaroa cu ta esun encarga cu Kapel di Alto Vista. E reunion tabata pa presenta mi idea na nan y pa haya e aprobacion necesario. Un reunion hopi interesante y caminda a trata mas reto cu tin pa cu mantencion di Kapel di Alto Vista.
Mirando cu Pastor a aproba e idea, mesora a cuminsa concretisa e idea conhuntamente cu Ministerio di Salubridad Publico y Turismo, percurando pa cumpli cu e palabracionnan haci durante reunion di dia 5 di november.
Dia 23 di november 2018 a tuma lugar un reunion entre coordinadornan Wolff y Rijsdijk di Minister, Srs. Jose Figaroa y Robert Jeandor y mi persona, pa por a concretisa e diseño, material etc. Manera aña habri e trabounan ta bay cuminsa pa realisa e parti di pilar y borchinan. Siguiente parti ta pa percura pa cuminsa entama e proceso pa bin cu un maneho nacional pa cu nos Kapel di Alto Vista.
ATA recientemente a realisa un ‘carrying capacity study’ caminda Alto Vista tambe a haya atencion. Pa e motibo aki mi a acerca Directora di ATA encuanto Kapel di Alto Vista y caminda mi a accentua e echo cu mester cuminsa traha ariba un maneho nacional pa loke ta trata nos Kapel di Alto Vista.
Dia 4 di december 2018 e directora di ATA a comparti cu mi algun idea cu nan a traha como reaccion ariba e resultado di e ‘carrying capacity study’ cu nan a realisa.
Durante 2019 mi lo sigui traha ariba demas puntonan di atencion. Uno di hopi urgencia ta e molester di stof. Pa e punto aki mi ta bay acerca Minister di Infrastructura na cuminsamento di e aña aki.
Mi ta contento cu poco poco mi ta logra cristalisa e deseo di nos tur pa percura pa nos Kapel di Alto Vista keda cuida y maneha debidamente. Mas cu tur cos mi kier enfatisa e necesidad pa garantisa cu Kapel ta keda un lugar caminda nos por bay reza den tur trankilidad na Mama Maria y Niño Hesus y busca paz interno.
Mi ta gradici Minister Dangui Oduber y su Ministerio, Pastor Santiago, Srs. Figaroa y Jeandor pa e sosten y entusiasmo demostra.