Ps un gobierno cu a priminti pueblo gobernacion transparente, caminda a propaganda integridad como e base di e programa di gobierno, prome minister Evelyne Wever Croes ta sigui sin cumpli cu pueblo di Aruba manera cu el a priminti durante di campaña electoral pero sin a cumpli.
Lider di fraccion di AVP, sr Marlon Sneek ta mustra cu den su discurso na pueblo di fin di aña, un biaha mas pueblo a wordo colma di promesanan cu no ta promesa, insistiendo cu tur cos ta bon cu e maneho cu su gobierno ta hibando pero sin sikiera sigura pueblo cu den e aña nobo di 2019, e lo cumpli cu e tantisimo promesanan cu su persona y su gobierno a haci na pueblo.
“Parlamento a caba di trata presupuesto 2019 caminda fraccionnan cu ta sostene gabinete Wever Croes, a aproba esaki caminda simplemente no por haya algo bon cu lo beneficia pueblo den e temporada nobo aki.
Ta papia cu a e situacion ta malo, ta sigui insisti cu su gobierno ta drechando cos y ta pretende pa pueblo guli manda abou, cu e reforma fiscal cu su tres fraccionnan aproba algun siman atras, ta sirbi interes di pueblo.
Con prome minister por hustifica y kier pa pueblo acepta y guli manda abou cu su gobierno ta bay ranca mas cu 136 miyon florin for di cartera di tur hende y di e placa aki pueblo lo beneficia pa un suma di 20 miyon so.
Pues claramente prome minister ta insisti pa tur hende kere cu en realidad cu su vision di bende un 6 pa un 9, ta algo corecto y berdad, mientras cu den tur sector di comunidad, e impacto di e tantisimo medidanan cu su gobierno a tuma contra pueblo, mester wordo acepta cu hubilo.
Loke por compronde for di e mensahe di prome minister di fin di aña ta cu solamente e grupo rond di e gobierno aki, hendenan cu a wordo emplea contra tur palabracion di e propio prome minister, famia- y amigonan, sponsornan, ta esunnan cu a wordo beneficia dor di e maneho dis u gobierno te cu awor.
Presupuesto 2019 ta ehempel di esaki ya cu ningun caminda por a mira cu gabinete Wever Croes ta dunando pueblo un alivio di e presion cu medidanan atros implementa, manera pueblo a spera cu su gobierno lo a logra.
Costo di bida ta sigui aumenta diariamente pa tur hende, principalmente esunnan cu entrada abou, cu apesar di palabranan bunita cu nan lo no bay paga mas loonbelasting, ta sinti aumento di costo di bida mucho mas halto cu e suma di 50 florin di reduccion cu gobierno a dicidi di duna cu e reforma fiscal.
Despues cu pa ocho aña largo gobierno di AVP a bira e inversionista mas grandi den economia di e pais, caminda a percura pa duna un aporte significante na esunnan di menos entrada, gabinete Wever Croes no tin nada pa duna pueblo pero si ta para tur dia ranca placa for di cartera di tur hende.
Contenido di e discurso di prome minister Wever Croes, ta duna pueblo e impresion cu Aruba tin un estilista na cabes di e pais, un persona cu ta papia bunita pero ta goberna mahos, ta papia asina bon di su gobierno, di plannan cu e tin pero cu nunca ta wordo cristalisa, keriendo cu e lo por sigui influencia e opinion y pensamento di pueblo cu cosnan lo drecha.
Nada di aumento di por ehmpel ‘reparatietoeslag’ cu gabinete Mike Eman a introduci pa aliva e peso pa esunnan di menos entrada, nada adicional pa pensionadonan, nada di reduccion di prijs di awa y coriente, net nada pa pueblo.
C’un orguyo grandi por a scucha Evelyne hustifica na pueblo cu decision di su gobierno pa aumenta impuesto riba preductonan alcoholico y esunnan cu ta contene sucu, esaki ta pa percura pa nos pueblo biba mas saludabel.
Pero na luga cu e placa aki cu e medida lo genera bay pa yuda esunnan mas debil, e placa aki lo bay pa cubri e maneho di su gobierno pa sirbi interes di hendenan di e partido, famia y amigonan, sponsornan y pueblo tin cu lidia riba su propio forsa debilita pa e mesun gobierno aki, pa mira con e ta sali dilanti.
En berdad prome minister a duna honor na su apodo cu su menahe di fin di aña, esta cu prome minister Evelyne Wever Croes realmente ta kere cu tur dia riba kalender ta 1 Aprilm dia di gaña,” lider di fraccion di AVP, Marlon Sneek a declara.