Parlamentario Endy Croes ta remarca cu Marlon Sneek den su discurso den Parlamento dia 20 di december ultimo, momento cu a trata e Reforma Fiscal, a mustra claramente cu e no ta domina e materia, mucho menos e ta comprende kico el a lesa, dado caso cu ta di berdad el a lesa e ley cual Croes tin duda riba dje. Ta incomprendibel con Marlon Sneek, un ex meneer di school por ta perdi asina den Parlamento. Ni kisas si ta politica bo kier hunga pa purba score bo mester por haci esaki den nocion di realidad. Awe nos lo divulga textualmente gritonan di desesperacion di Marlon Sneek den parlamento y lo ilustra con e ta pone su mes pasa pa un bobo.
Manipulacion of bobedad?
Segun Marlon: “Gobierno ta gaba cu 12000 hende lo no bay paga grondbelasting mas pero den mesun rosea nos por lesa den e ley cu ta pidi y ta pone 3 luna di tempo pa tur hende entrega un taxatie rapport”. Marlon a continua: “Si ta awor bo ta bay duna bo taxatie rapport pa gobierno bay wak ki balor e casnan tin, pues ta di unda a saca 12000 cas cu no lo bay paga grondbelasting mas”. Laga nos duna Marlon Sneek un les di bida awe y mustr’e cu echonan con sea e kier manipula of sea e ta un bobo y no ta comprende kico e ta lesa. Den e ley cu gobierno a presenta na Artikel IV lid 2 tin skirbi: “in artikel 25 van de landsverordening grondbelasting AB 1995 no GT 3, dient de belastingplichtige die redelijkerwijs weet of had moeten weten dat hij ten onrechte geen aanslag grondbelasting heeft ontvangen voor het jaar 2018, uiterlijk 1 april 2019 te voldoen aan de aangifteplicht zoals opgenomen in artikel I onderdeel D”. Pues claramente ta trata un aangifteplicht cu personanan cu tin propiedad y no ta ricibiendo un cobransa di grondbelasting pa cualkier motibo mester meld esaki ultimadamente 1 di april 2019 na inspecteur. Ningun pero ningun caminda ta para cu bo mester presenta cu un taxatierapport.
NO mester taxatierapport
Den e memorie van toelichting di e mesun ley tambe ta splica lo siguiente: “Ten behoeve van de heffing wordt daarom in artikel I, onderdeel D, in het voorgestelde artikel 25 een meldplicht geregeld voor degene die vermoedelijk belastingplichtig wordt ten aanzien van een onroerend zaak”. Pues den e memorie van toelichting atrobe ta accentua un meldplicht solamente pa esnan cu tin un propiedad pero cu no ta haya un cobransa. Ta di unda Marlon Sneek por a conclui cu tur hende na Aruba den 3 luna mester entrega un taxatie rapport? Ningun pero ningun caminda den e ley na e artikel aki ta papia di un taxatierapport. Pa tur claridad, bo deber ta solamente pa meld cu bo tin un propiedad dado caso bo tin un propiedad y nunca pa un of otro motibo administrativo di belastingdienst bo no a ricibi un cobransa den pasado. No mester hiba ningun taxatie rapport!! Momento cu bo meld ta responsabilidad di Inspecteur pa percura pa haya un balor pa bo propiedad. Esaki ta e puro berdad. Ta recomendabel pa Marlon Sneek repasa e landsverordering LV 1995 no GT 3 y e Algemene LV Belastingen (ALB) kisas cu un “tolk” hunto cune pa splik’e pa e por comprende. Parlamentario Croes a pone textualmente e partinan mas importante den e ley pa asina desenmascara e manipulacion di Marlon Sneek y AVP pero alabes ilustra tambe cu contenido y prueba e incapacidad di Marlon Sneek pa comprende kico e ta lesa y pa e stop di papia co’i loco den Parlamento. Ta un berguensa pa den aña 2018 tin politiconan di panlefi manera Marlon Sneek di AVP ta baha nivel di Parlamento na e forma aki. Croes ta termina bisando cu e ta spera cu esaki ta aclaria cualkier inkietud cu Marlon y AVP por a causa den comunidad.