Parlamentario Endy Croes ta mira atras riba un aña 2018 cu tabata tin su retonan grandi. Un aña 2018 cual sigur no tabata un aña facil. Como Parlamentario a percura pa trata masha hopi ley, reuni cu masha hopi instancia y departamentonan y alaves a eherce un trabao di control fuerte riba gobierno, esta a haci locual pueblo ta spera pa un Parlamentario haci. Banda di esaki a atende pueblo riba un base regular te hasta den fin di siman na Parlamento di Aruba brindando e ayudo te unda cu nos por y guia e ciudadano den su necesidad. Tur cu tur nos ta satisfecho cu aña 2018, unda mester a lora manga di camisa y tuma hopi decision mediante ley pa salba Aruba cual tabata na rand di bancarota.
Parlamentario Endy Croes ta sigui splica cu unabes bo aparece riba un lista politico ta pa bo traha pa bo pais sin importa e situacion cu bo a hereda bo pais aden. Tin un programa firma pa Coalicion “Hunto pa Aruba” y e programa aki ta nos compas y guia pa e periodo di 4 aña. Ohala cu nos por a logra mucho mas den un solo aña manera kisas ta e anhelo di pueblo pero hunto nos lo persevera pa saca Aruba for di e abismo di cual nos a encontre aden. Aruba den 2018 tabata un Aruba den transicion, esta un Aruba cu a wordo converti di un Aruba carga cu un debe esta e Mega Debe y un Crisis Social pa un Aruba controlabel y sostenibel pa futuro.
Sinembargo retonan ta keda grandi pa 2019. Parlamentario Endy Croes ta splica di tin e fe y confiansa cu bao di e guia di nos Minister President Evelyn Wever Croes y henter e Coalicion nos ta riba e bon caminda. Primordialmente ta tene cuenta cu e hende, esta pa e gobernacion aki e hende ta central. Tin bunita plannan pa futuro pero ta tene cuenta tambe pa no endueda nos futuro generacion y ta busca e balans corecto den esaki. Pueblo mester tin fe, pueblo mester tin e confiansa, pueblo mester tin e speransa y pueblo mester persevera pa hunto nos logra cosnan grandi pa Aruba.
Importante ta trece bek e trankilidad y stabilidad den pueblo. Importante mester ta cu tur hende ta conta. Importante ta cu tur hende mester tin un oportunidad husto den bida pa progresa. Importante ta entre otro pa sigui crea cuponan di trabao pa nos conciudadanonan pa asina tur por tin un mihor porvenir. Importante ta pa nos tin un bon maneho di salubridad pa nos pueblo. Importante ta pa nos atende na e mihor forma cu e crisis social garantisando e seguridad na nos muchanan. Importante ta pa garantisa e seguridad di henter Aruba. Importante ta pa nos por tin un finansas publico sostenibel y bao control. Importante ta pa nos reforsa control di prijs riba comestibel di prome necesidad pa nos pueblo. Importante ta pa nos por inverti den nos deporte pa por tin un pueblo saludabel fisicamente y cu caracter. Importante ta inversion den nos educacion pasobra un pueblo educa sigur ta prospera. Importante tambe ta pa nos por kita e redtapenan y facilita nos entrepreneurnan y inversionistanan un caminda mucho mas decente y facil pa cana unda nan por logra habri nan negoshi den un tempo record stimulando asina nos economia. Importante tambe ta pa asfalta nos camindanan den bario kitando asina e molester di stof. Pues tur entre otro ta importante y tur lo wordo atendi den mas profundidad den 2019.
Parlamentario Endy Croes ta bisa cu tin hopi montaña cu nos lo mester crusa y nos lo encontra bareranan nos dilanti cual kisas lo kier impedi esaki pero nos mester ta dispuesto pa crusa esakinan hunto pa garantisa e felicidad di henter nos pueblo. Cada un di nos ta conta y cada un di nos tin e mesun balor. “Leaving no one behind”. Hunto nos ta logra y e promer cambionan grandi lo bay ta notabel den 2019.
Parlamentario Endy Croes ta termina deseando henter pueblo di Aruba un prospero aña 2019. Cu Papa Dios drama su bendicion riba Aruba y cu por reina paz, felicidad y harmonia den cada hogar.