E ultimo dia di aña ta un fecha simbolico cu ta invita nos na reflecciona riba locual e aña tras di lomba a nifica pa nos, y con nos ta proyecta e aña entrante. Mi tin sigur cu 2018 tabatin momentonan bon y malo, pero independientemente si e tabata un aña pa recorda of no, tin personanan cu tabata t’ey incondicionalmente pa nos, brindando nos nan cariño sincero un aña mas. Maske cu amor pa otro persona ta algo cu lo bo tin di demostra durante henter aña, e fecha aki ta un oportunidad special pa nos demostra esnan importante loke nos ta pensa di nan y con esencial nan ta den nos bida.
“Aña nobo, bida nobo” ta e frase cu popularmente nos ta scucha den e dianan aki, y pa nos logra cu e aña nobo aki trece cambionan positivo pa nos bida, nos tin di cuminsa na cambia e manera cu nos ta percibi loke ta rondona nos. Ban ta mas positivo y perseverante pa logra e metanan cu nos a pone pa 2019. E experiencianan cu nos a biba e aña aki tabata unico y lo keda semper como un recuerdo pa yuda nos siña di nan.
Como pais, nos a biba un aña yena cu reto y obstaculo cu nos a logra supera cu solucionnan berdadero y duradero pa nos pueblo. Di e manera aki, Gabinete Wever-Croes ta mantene e compromiso pa trece prosperidad bek pa nos Aruba. Aña 2019 lo ta un aña unda nos lo mira progreso realistico pa nos comunidad. Un aña di transformacion positivo pa nos isla, den cual nos lo sigui construi e caminda di e futuro briyante cu tanto nos ta desea pa Aruba.
Cu aña 2019 permiti abo y bo sernan keri logra yega na haya e mihor cu bida tin pa ofrece, balorando semper esnan cu stimabo mas, pasobra sin nan nada lo ta mescos. Exito y bendicion pa e aña nobo aki!