A haci peticion na Minister di Husticia pa introduci ‘parkeer kaarten’ pa hendenan cu limitacion fisico
ORANJESTAD, Aruba: Parlamentario di Fraccion di AVP, Robert Candelaria, a cuminsa cu e proyecto di “Mi wiel tambe ta conta”. Tur cos a cuminsa desde cu na final di aña pasa ora cu Jos Solagnier a acerk’e cu peticion pa yuda skirbi un carta pa su yiu cu limitacion fisico por haya e carchi di parkeer manera ta regla den ley di trafico articulo 28.
Despues di a busca tur regla y a traha e carta, Jos Solagnier, a fayece. Parlamentario Candelaria no a laga cos te eynan y a cuminsa papia cu hopi hende cu limitacion. Un señora a cuminsa cana e caminda pa haya un carchi di parkeer pa hendenan cu limitacion, pero no a logra esaki ainda. E situacion aki a kibra e demotiva hopi, kendenan a pensa cu no lo logra esaki nunca mas. No por keda sin pone atencion riba dje pa asina logra esaki pa esunnan cu tin limitacion. Den e comunidad di Aruba tin hopi hende cu tin realmente curason pa yuda.
Parlamentario Candelaria a busca informacion y a bin topa cu ambtenaarnan cu ta traha den fundacion cu realmente kier mira e asunto aki regla. A topa cu boluntarionan den e field cu kier yuda y a sinti cu nan ta man mara, cu tin un limitacion y e Parlamentario no ta di acuerdo cu nan. E base legal t’ey y loke falta ta e deseo di boluntad pa cumpli cu ley ta regla caba.
A organisa dos charla y actividadnan social cu clientenan di Funari, Maris Stella, unda a sali cu nan y a laga nan mira bahada di solo banda di hotel. Un luga a coopera cu nan y nan por a come eynan, pero tur esaki ta pa enfatisa cu nan calidad di bida tambe ta importante. Nan tambe mester por socialisa, pasa un bon tempo y gosa di loke nos por gosa tur dia. Tin hopi trabou adelanta haci caba pa e “bouwvoorschriften” cu tin na Aruba, unda mester y con pa ahusta nan. A partner cu e Fundashon Alton Paaz di Corsou cu a haci hopi trabou adelanta y a mira cu ta necesario pa traha hunto, pasobra por comparti experencia y informacion tambe yuda otro cu idea y sugerencia. Den e “stukken” di “ter inzage”, minister a pone un rapport “beleidsplan” na caminda pa un miho participacion pa personanan cu limitacion di 2015-2017.
Actualmente tin cifranan solamente data di 2010 cu ta e ultimo censo haci riba esunnan cu limitacion fisico. Parlamentario Candelaria a papia cu diferente instancia riba e cifranan aki, loke ta preocupante ta cu e grupo di limitacion fisico ta birando mas grandi cu normal. Nan ta pensa cu e motibo di esaki ta door di stroke, pero tin hopi motibo pakico e grupo di limitacion fisico ta crece, el a expresa.
Tin hopi cos cu mester regla y no mester costa hopi placa. Parlamentario Candelaria a entrega un peticion na consehero Baez di Minister di Husticia cu diferente punto. Den e peticion e ta pidi pa introduci parkeer kaart segun leynan. Esey lo duna autorisacion mesora na Cuerpo Policial y Ministerio Publico pa traha proces-verbaal contra hendenan cu ta kibra e regla aki di parkeer den e vak sin tin e carchi aki. E ley ta regla con e parkeer kaart mester ta y e Parlamentario a traha un draft di esaki. Tin 10 parkeerplaats pa hendenan cu limitacion fisico y esaki ta poco, pero tambe ta pidi pa e parkeer vaknan aki bira gratis pa nan. Tur esaki ta pa yuda e persona mobilisa mas lihe, pasobra e tin di busca luga, parkeer auto y ainda busca pa bay paga e vak y bin bek pa pone e papel. Esaki lo ta dificil pa nan.
Tin hopi aspecto cu mester haya sa ainda, manera terenonan priva cu ta pone borchi pa hendenan cu limitacion fisico. Mester mira con esaki ta den ley. Parlamentario Candelaria ta buscando informacionnan di e cantidad di turista cu mester di e yudansa pa ora di rolstoel. Tin hopi cos pa haci riba e topico aki.