Presupuesto Supletorio 2018 a wordo aproba dialuna ultimo den Parlamento. Prome Minister Minister Evelyn Wever-Croes den conferencia di prensa diahuebs, a splica e motibo pa cua na final di cada aña mester bin un presupuesto supletorio.
Kico ta un presupuesto supletorio? Na comienso di aña Gobierno ta haya aprobacion di Parlamento di su presupuesto. Presupuesto 2018 a haya aprobacion na april ultimo. Na fin di aña, si tin cambionan, Gobierno mester bay bek Parlamento pa asina haya aprobacion di Parlamento si a desvia di e gastonan pa cua a haya aprobacion na principio.
Na april 2018, Gabinete Wever-Croes a presenta Presupuesto 2018 na Parlamento. Debi cu ora a drenta gobernacion, e Presupuesto 2018 ainda no a wordo traha y entrega, Gobierno a entrega esaki te na april cu un deficit di 149 mil florin. Gobierno a haya aprobacion di Parlamento.
Topando mas sorpesanan durante aña, Gobierno mester a haci cambionan necesario na su presupuesto. Un sorpresa grandi tawata e garantianan di hotel cu a wordo duna pa Gobierno di Henny Eman na aña 1987. Ta trata aki di e Famoso Sache. Esaki tawata e ultimo aña pa paga e garantianan aki despues di 15 aña ta paga 18 miyon florin tur aña. Pagando e ultimo pago, Gobierno a haya e sorpresa cu tin 7.2 miyon florin adiconal na gastonan pa finalisa tramitenan (afwikkelingskosten). Gobierno sinembargo no a bay Parlamento pa pidi 7.2 miyon florin adicional riba e presupuesto ya aproba cu ya tawata tin un deficit di 149 mil florin. Teniendo cuenta cu mester baha e deficit, Gobierno a bay busca e 7.2 miyon florin aki den otro gastonan pa asina cumpli cu e pago aki cu ta bin for di tempo di Gabinete Henny Eman.
Prome Minister a menciona otro sorpresanan cu a encontra durante e aña. Proyectonan PPP ta birando un peso enormemente grandi pa nos pais. E aña aki PPP ta costa nos 65 miyon florin y pa e otro aña e lo costa nos 80 miyon. Asina mes Gobierno a percura pa cubri’e kedando dentro di e 149 miyon di deficit cu a wordo aproba pa Parlamento na april.
“E Presupuesto Supletorio ta ‘budget neutral’. Gobierno no a gasta ni un florin extra di loke Parlamento a aproba. Tin hende ta puntra e pakico cu toch mester a bin cu ne atrobe den Parlamento anto. Esaki ta pasobra a bin cambionan. Gobierno mester a paga e 7.2 miyon di e garantianan di Sache di tempo di Henny Eman y esaki mester a wordo saca di un caminda y mester haya e aprobacion di Parlamento”, Prome Minister a duna di conoce.
Prome Minister a indica cu for di su ministerio tambe el a baha un adicional 1 miyon florin pa asina contribui na e fondo di 7.2 miyon. Asina tambe otro ministerionan a contribui.
“Cu hopi orguyo mi ta bisa cu Gabinete Wever-Croes a mantene Presupuesto Supletorio 2018 ‘budget neutral’. Kiermeen no a bin ni un florin extra di deficit”, Prome Minister Evelyn Wever-Croes a duna di conoce.