Home Politics Mientras cu Gabinete Wever-Croes a entrega Presupuesto Supletorio 2018 ‘Budget Neutral’ ...

Mientras cu Gabinete Wever-Croes a entrega Presupuesto Supletorio 2018 ‘Budget Neutral’ HISTORIA DI DEFICITNAN ADICIONAL DI MIKE EMAN TA UN REFLEHO DI MAL GOBERNACION DI UN GOBIERNO IRESPONSABEL

 

 

Durante tratamento di Presupuesto Supletorio 2018 dialuna ultimo, Gobierno di Aruba no solamente a demostra cu a entrega e Presupuesto Supletorio ‘budget neutral’, kiermeen sin un florin extra di deficit. Tambe Gobierno di Aruba a mustra e historia di e ultimo añanan di gobernacion di Gabinete Mike Eman con hopi biaha e Gobierno anterior a bin Parlamento cu deficit adicional.

 

Parlamento ya na april a aproba Presupuesto 2018, pero debi mas tanto na cambionan ocacional door di e garantianan di Sache di 15 aña pasa di Gabinete Henny Eman y como tambe di e proyectonan PPP di Gabinete Mike Eman, mester a haya aprobacion atrobe di Parlamento pa Presupuesto Supletorio 2018.

 

Contrario na Gabinete Wever-Croes, Gabinete di Mike Eman su historia di bay bek Parlamento cu deficitnan adicional ta refleha e mal maneho di un gobierno iresponsabel. Durante e ultimo añanan AVP a bay bek Parlamento pa trata Presupuesto Supletorio cu deficitnan adicional. Esaki kiermeen cu e cambionan cu nan a haci durante aña, nan a gasta mas di loke Parlamento ya a aproba den e presupuestonan corespendiente cu e aña. Pa duna un ehempel, na aña 2012, e deficit adicional tawata di 1.8 miyon. Esaki kiermeen cu e gobierno di AVP a gasta 1.8 miyon mas di loke tawata aproba den e presupuesto y nan a bay pidi aprobacion pa e 1.8 miyon extra aki na final di aña na Parlamento. Den e tabel adhunto por mira e deficitnan di añanan 2011 pa 2017 na unda na aña 2014 te hasta a yega 210 miyon extra riba e deficit.

 

“Esaki ta loke a hinca Aruba den e problemanan financiero cu Aruba ta den. Pa Gabinente Wever-Croes ta un compromiso pa percura pa keda dentro di nos presupuesto apesar di e sorpresanan cu a encontra manera e garatianan di Sache bou di Henny Eman. Nos a busca solucion y a pag’e sin pone nada extra riba e deficit di 149 miyon florin. Presupuesto Supletorio 2018 a wordo aproba y mi ta contento di e sosten di nos Parlamento”, Prome Minister Evelyn Wever-Croes a duna di conoce.