Parlamentario Endy Croes ta felicita Minister Glenbert Croes kende dialuna ultimo tabata den Parlamento di Aruba pa trata e Interim Begrotingsfonds Social Crisisplan cual lo bira un fondo temporario – valido di 1 augustus 2018 pa 31 december 2019 – pa atende cu e Crisis Social cu e gobernacion aki a hereda. Kisas te hasta mester yama esaki e explosion social como cu locual Aruba ta pasando ta algo hopi preocupante.
Pa e Crisis Plan mas di 30 instancia, fundacionnan, departamentonan cu ta atende di un of otro forma cu asuntonan social a bini hunto y a reuni y cada un a traha y a entrega un programa di exigencia, esta e “programa van eisen”. E documentonan aki a wordo traduci na placa, esta cuanto minimo lo bay costa pa por tin tur instrumento na su lugar cerca cada instancia pa atende y controla e problemanan social. E rapport final a ilustra cu mester minimo 34 miyon reparti den 2 aña esta 17 miyon den 2018 y 17 miyon den 2019. Momento cu e presupuesto 2018 a wordo aproba dia 25 di april 2018 Coalicion a aproba e promer parti esta e suma di 17 miyon pa cu aña 2018. Sinembargo Minister Glenbert Croes encarga cu asuntonan Social y Labor kende ta conoci como un ser humano cu su orea ta na curason di pueblo semper ta para cla pa resolve cualkier problema y no ta sinta warda pero desde momento cu el a huramenta como Minister a sa di lora manga di camisa y duna e atencion real al instante na e problema social grandi cu tabata asotando Aruba.
Banda di esaki Minister Glenbert Croes a convence Hulanda pa 1 Miyon florin cu tabata tin den fondonan di FDA bay pa UNICEF di cual UNICEF ta aporta cu 1 Miyon na e Plan Crisis Social cual ta haci esaki 35 Miyon den total. Durante varios ora dialuna ultimo Minister Glenbert Croes a elabora den extenso cu su conseheronan presente den Parlamento y a pone un cantidad enorme di documentonan y rapportnan ter inzage pa Parlamento cual tur ta mustra den mesun direccion, esta e atencion urgente cu e problema social ta rekeri. Ta condenabel cu 8 aña largo gobierno anterior a ignora departamentonan social cual a conduci na e problema grandi aki. Rapportnan a papia cla confirmando esaki. 25 april 2018, momento cu Parlamento a aproba e Crisis Plan incluyendo e 17 miyon, Fraccion di AVP a vota contra desaprobando e ayudo social.
Pero dialuna ultimo momento cu Minister Glenbert Croes a splica detayadamente e importancia pa activa e cadena di fundacionnan, departamentonan y instancianan pa traha den mesun direccion y cu e financiamento ta di importancia pa por savalguardia nos muchanan pa cu futuro, por a sinti e actitud di AVP a cambia. Aunke cu nan a vota contra na april ultimo na final di e reunion AVP a bin para banda di Coalicion y 21-0 a vota unanimamente na fabor pa e Interim Begrotingsfonds Social Crisisplan. Parlamentario Endy Croes ta termina splicando cu Minister Glenbert Croes a logra un hazaña grandi pa cu e problema social y alaves a logra unifica Parlamento den su totalidad riba e tema aki. Aruba sigur lo sali gana.