ORANJESTAD – Deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacionnan no tin bida. Pa e motibonan aki, Minster Dangui Oduber ta haya importante pa deporte na Aruba haya e atencion debido.
Minister Dangui Oduber ta splica cu apesar cu e fondonan pa deporte ta hopi limita, asina mes a haci hopi pa deporte. E mandatario a menciona cu a yuda diferente clubnan cu material, airco y mucho mas. E deportistanan cu tabata tin mester di un of otro yudansa pa haci nan deporte tambe a haya ayudo via Sportsubsidie. A organisa Premio Excelencia den Deporte pa duna reconocimento na tur e atletanan cu a destaca den aña 2017 y esaki sigur lo continua pa e proximo añanan nos dilanti, segun e mandatario. Veld di Kudawecha unda semper di weganan di softball y baseball porfin ta bay haya illuminacion nobo.
E Minister ta lamenta cu Fundacion Lotto Pa Deporte ta stroba progreso pa deporte y deportistanan, e mandatario a duna di conoce cu e lo por a haci mucho mas pa deporte si e tabata tin e sosten di FLPD. Manera e dicho ta bisa “penado no ta pena pa largo” y pronto deporte tambe lo bay stop di pena.