Home Local Instruccion nobo tocante ‘Afpakken’ na vigor

Instruccion nobo tocante ‘Afpakken’ na vigor

 

 

Procurador-general di Aruba a recientemente saca un instruccion nobo riba tereno di ‘afpakken’. E instruccion aki ta establece reglanan pa kitamento (‘afpakken’) di capital criminal dor di Ministerio Publico.

E instruccion ta describi e instrumentario legal cu Ministerio Publico tin na su disposicion na momento di kita ganashi financiero economico procedente di actividadnan criminal.
Central ta para semper cu hende no mag di saca ningun tipo di benificio di crimen.
E autoridad di Ministerio Publico por wordo usa solamente ora ta existi sospecho husto di culpabilidad cu un sospechoso a comete un hecho castigable.

Kitamento di capital criminal ta di gran importancia den bringa criminalidad organiza y criminalidad subversivo.
Pa logra exito den esaki, cooperacion entre e partnernan den cadena di seguridad y husticia ta crucial!
Ta pa e motibo ey mes cu Afpakteam Integral di Aruba a wordo lanta riba prome di maart 2017 entre Ministerio Publico, Cuerpo Policial di Aruba, Aduana, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht Steunpunt Aruba, Meldpunt Ongebruikelijke Transacties (Meldpunt) y RST.

Desde cu Afpakteam a wordo lanta, tabatin logronan importante.
Den varios investigacion Afpakteam a pone beslag riba propiedadnan manera cas, vehiculonan, brommernan y speedboatnan.
E bienesnan aki lo wordo bendi na findishi, y e placa cu nan lo rindi lo wordo stret den e Fondo di Combati Criminalidad (Criminaliteitsbestrijdingsfonds).
Afpakteam a hinca desde su inicio un 1.7 miyon florin di capital criminal den e Fondo di Combati Criminalidad.
E cen di e fondo aki ta wordo usa pa bringa criminalidad na Aruba, loke kier meen cu e ta placa cu ta bay directamente na benificio di comunidad.
E instruccion di afpakken ta trata tambe tramitacion di beslag.