Home Politics Minister Armando Lampe: Minister Lampe a gradeci Dr, Suzanne Sisley y Dr....

Minister Armando Lampe: Minister Lampe a gradeci Dr, Suzanne Sisley y Dr. Pien Metaal pa nan aporte den e conferencia di Cannabis Medicinal

 

 

 

Diaranson 5 december, Minister di Enseñansa, Ciencia y Desaroyo Sostenibel, dr. Armando Lampe a despedi y gradeci 2 persona cu tabata clave den e exito di e conferencianan cu tabata tras di lomba.

 

Dr, Suzanne Sisley, ta un doctor renombra na Merca, cu ta trahando riba e “clinical trials” pa cu e uzo di Cannabis Medicinal pa FDA di Merca. Den e dianan cu dr. Sisley tabata na Aruba a aprobecha su presencia na unda el a comparti su conocimento cu diferente personanan y instancianan cu ta ocupa cu e tema di legalisacion di Cannabis Medicinal aki na Aruba. E tambe tabata un di e oradornan durante e prome conferencia tocante Cannabis Medicinal cu a tuma luga siman pasa diasabra 1 di december. Durante su presentacion, dr. Sisley a elabora ampliamente riba e rol cu sciencia ta hunga den e aceptacion di e legalisacion di Cannabis Medicinal. El a splica un poco di su experiencia cu e tabata tin na diferente paisnan, na unda cu su conseho tabata cu testimonio di pashentnan cu bon resultado, ta e miho arma cu por uza pa convence e opinion publico.

 

Tambe Minister Lampe a duna despedida di dr. Pien Metaal cu a representa e Trans National Institute. Su posicion na TNI ta “Senior Project Officer” y ta un investigador cientifico. Su rol na Aruba tabata principalmente co-organisador di e conferencia cu a tuma luga diabierna 30 di november, na unda un cantidad grandi di paisnan a wordo representa. Den e reunion aki su persona a dirigi tambe e reunion na unda cu diferente topico a bin na remarca y sigur ta topiconan di suma importancia. Ta e intencion di saca un reportahe completo di e conferencia cu a wordo dirigi a base di “Chatham House Rule”, cu ta un manera pa dirigi un reunion, na unda cu declaracionnan lo wordo presenta, pero cu su anonimidad. Pues no lo divulga, kendenan lo a bisa kico.

 

Tin cu remarca cu e dos personanan aki a hunga un rol importante den e fin di siman cu a pasa pro legalisacion di Cannabis Medicinal. Minister Lampe a gradeci nan pa nan aporte y a bisa nan cu sigur, nan ta bon bin, pa sigui yuda Aruba den e legalisacion di Cannabis Medicinal.