Home Politics Rocco Tjon: Recursonan ta wordo aloca pa e departamentonan y no e...

Rocco Tjon: Recursonan ta wordo aloca pa e departamentonan y no e oficina di Ministernan

E maneho financiero responsabel di Gabinete Wever-Croes ta conta cu sosten di Fraccion di MEP. Pa prome biaha den hopi aña pais Aruba por conta cu un presupuesto supletorio caminda Gobierno no ta haci un peticion na Parlamento pa mas recurso.

 

PRESUPUESTO SUPLETORIO 2018

Gabinete Wever-Croes a ehecuta presupuesto 2018 dentro di e margin cu a wordo aproba na prome instante. Esaki por lesa bek tambe den e rapport di CAFT (Cft 201800237) riba presupuesto supletorio. CAFT ta remarca cu e “financieringstekort” a keda igual.

 

Esaki no ta algo usual si nos compara maneho di sr. Eman na 2016 por ehempel. Gabinete anterior a pidi recurso extra den presupuesto supletorio. Apesar di esaki e cuenta anual 2016 a conoce un aumento adicional di 10 miyon florin.

 

PRESUPUESTO 2019

Conforme presupuesto 2019, Parlamento por tuma nota cu e normanan financiero stipula pa 2019 tambe lo wordo logra. E maneho responsabel ta wordo caracterisa como uno caminda recursonan ta wordo inverti den e departamentonan di Gobierno y no den e bureau di Ministernan.

 

Pa ilustra esaki nos por wak cu sr. Mike Eman su bureau tawata conoce un presupuesto di 12.7 miyon florin na 2017. Sra. Evelyn Wever-Croes na otro banda ta maneha su bureau cu solamente 4.6 miyon florin.

 

PA FINALISA

Gobierno a inicia e rumbo pa yega na finansas duradero atraves di un maneho responsabel, ancra den e Memorandum economico financiero. Na su turno ora trata e ley di supervision financiero, Parlamento lo coregi e parti costitucional y alaves inicia e proceso pa recupera Aruba su autonomia financiero bek.