E organizacion Switch Foundation a comparti cu hobennan caribense pa promove e alerta y control pa loke ta e abusonan di indole domestico, como parte di un ciclo di actividadnan impulsa pa e gobierno di St. Eustatius.
Recientemente, e gobierno di St. Eustatius, a traves di e departamento di Youth Affairs y Children’s Rights, a activa un plan di atencion y alerta contra e abuso domestico, accion dirigi na hobennan adolescente, den cuadro di e siman internacional di e eliminacion di e Violencia Domestico.
E actividadnan conmemorativo a tuma lugar entre e dianan 25 y 27 di November na St. Eustatius; a inicia cu e marcha silencioso pa e eliminacion di e violencia domestico, caminata den cual a participa, ademas di hende muhernan, muchanan y hende hombernan. Mester destaca cu e isla aki tin un comunidad di 2.000 habitante.
Durante e oportunidad aki, e mensahe a wordo entrega door di Switch Foundation; organizacion sin fin di lucro; a traves di su fundador y realizador audiovisual, Paula Nahr, kende, pa medio di audiovisualnan dinamico y efectivo, cu un charla ameno di concientizacion, a comparti cu mas di 100 mucha di e isla.
Nahr a expresa cu el a wordo acerca pa e gobierno di St. Eustatius pa realiza e actividad ya cu “na e isla tin hopi mucha muher cu no ta consciente di nan poder di bisa no na e abuso domestico; ademas, ta hopi e mucha muhernan cu no ta sali for di nan cas, lugar unda e violencia ta sosode pa via di e dependencia economico”.
Pa Nahr, kende tambe ta investigador di situacionnan di violencia domestico “ta existi poco conexion den e relacion mayornan-yiunan. Tin masha tiki ‘parental guidance’ y e hobennan no ta mantene un relacion estrecho y di confianza cu nan mayornan”, el a comenta.
Segun estudionan realiza pa Nahr, a traves di Switch Foundation, por deduci cu “e violencia domestico ta ripiti cu patronchinan unda e hoben ta copia e tata, y asina, sucesivamente, locual ta wordo mira como algo normal den e sociedad”.
Banda di esaki Paula Nahr ta kere cu ta importante transmiti e mensahe cu Switch Foundation ta promove: “Mi target ta e hubentud. Y e fundacion ta presenta audiovisualnan, como metodo eficaz y dinamico pa capta e atencion di e hobennan y alerta nan contra e problematicanan social. Na e oportunidad aki, mi a conecta cu e hubentud desde mi experiencia personal ante e violencia domestico, y con mi a logra kibra e ciclo aki”, a bisa.
Paula Nahr a haci su presentacionnan na Gwendoline van Putten School, dilanti un audiencia conforma pa muchanan cu edadnan entre 11 – 13 aña. Cada encuentro a dura 45 minuut, cu a inicia cu un trailer di 3 minuut produci pa Switch Foundation, den cual e mensahe ta e alerta pa loke ta e explotacion sexual di hende muher y mucha muhernan.
E gobierno di St. Eustatius a haci conexion cu Switch Foundation; cual tin como meta hiba e mensahe cu atencion special den e comunidadnan di e islanan di Caribe, y Latinoamerica; despues di coincidi cu su fundador den e UNICEF Child’s Rights Film Festival, den su edicion caribense realiza na Corsow.
Den e oportunidad aki, Nahr a representa Aruba como miembro di e hurado. Eynan Carol Cuvalay, Policy Support Officer, y Dirkje de Jong, Policy Coordinator of Domestic Violence, Child Abuse and Children´s Rights, ambos adscrito na e Public Entity di St. Eustatius, a acerca Nahr pa activa e mensahe di prevencion pa hobennan y hende muhernan.
Por mira e siguiente documentario Promesa Falso tocante traficacion di hende riba Facebook, Instagram y YouTube di Switch Foundation.