Sra. Mervin Wyatt Ras ta bolbe sorprende cu su nivel di politica of mihor dicho su falta di nivel di politica. E ta prefera di baha den riool pa purba bagatelisa maneho di Ministro Glenbert Croes enbes di acepta e invitacion cu a haci na sra. Mervin Wyatt Ras.
Sra. Mervin Wyatt Ras tin e pudor di punta dede na e maneho di e gobierno aki? Mester refresca Mervin Wyatt Ras su memoria con su persona hunto cu su Gobierno di AVP a neglisha tur esnan cu ta den situacion social dificil? Con Mervin Wyatt Ras a permiti pa mas y mas ciudadano cay den un crisis cu awe e gobierno actual ta trahando duro pa atende cune, esta yudando esnan di menos recurso den comunidad? Con Mervin Wyatt Ras a yama e cartera di Asuntonan Social como pret pakket? Con Mervin Wyatt Ras a hunga kaki sconde cu rapportnan devastador di e situacion social aki na Aruba pa hunga politica barata? Con Mervin Wyatt Ras no tabata tin ni e curashi pa lanta para pa defende nos muchanan, nos hendenan special, nos grandinan durante 8 aña largo? Cu ni ora muchanan y hobennan tabata perde nan bida door di e crisis social a conmove Sra. Wyatt Ras suficiente pa actua?
Negligencia pa 8 aña largo no tabata suficiente pa Sra. Wyatt Ras, y ainda e kier sigui den su racha di politica di dinosauro cu a worde rechasa. Mervin Wyatt Ras tabata tin e balentia di vota contra e proyecto di plan di crisis social y awor kier punta dede. Sra. Wyatt Ras tin e balentia di papia di wega, pero e ta lubida cu negligencia ta un wega hopi cruel y specialmente si e wega aki ta ser hunga riba lomba di esnan cu awe si ta purbando di brinda ayudo y atende cu e plan social. Di haci mihor uso posibel di e atencion pa e tereno social, mihor uso di e recursonan cu a ser poni pa e tereno social. E wega di Mervin Wyatt Ras ta un ofensa pa tur den e tereno social cu si kier trece alivio na e crisis social cu Sra. Mervin Wyatt Ras a neglisha pa 8 aña largo.
No ta desea di gasta mas energia cu Mervin Wyatt Ras. Ta prefera di usa tur energia y atencion pa e trabou cu tin nos dilanti. Ta bolbe apela na e sentido di responsabilidad di Sra. Mervin Wyatt Ras pa duna un man y contribui na e solucion ya cu e trabou ta hopi y ta urgente.
Â
Â