Oranjestad – Diahuebs 21 november 2018, e ‘Leadership Academy 3.0’ a wordo clausura, caminda tur participante a ricibi, durante e ceremonia di clausura, un certificado di participacion for di Grant Thornton Aruba y Nyenrode Business Universiteit.
Despues di a lansa e Leadership Academy na januari 2014, e programanan combina di 2014, 2015 y 2016 ya caba a wak mas di 200 graduado ariba nivel di director, manager i supervisor, pa tanto e sector publico como sector priva di Aruba.
E obhetivonan di e programa aki ta pa eleva liderazgo na Aruba, ofrece un plataforma na e ehecutivonan caminda nan por bin hunto pa discuti y comparti experencia y dunanan e oportunidad di reforsa nan relacion. Ademas e participantenan ta haya e oportunidad di conoce otro ehecutivonan den e mundo di comercio y sector publico.
Na januari 2018 a cuminsa cu un concepto diferente, den forma di un colaboracion cu Nyenrode Business Universiteit. E universidad aki a wordo funda na 1946 y ta un di e universidadnan di ‘business’ mas reconoci na Hulanda y ta ofrece varios masterclass pa ‘managing directors’ y directornan di companianan renombra na Hulanda. Nan ta concentra riba e creacion di un futuro sostenibel door di crea lidernan responsabel.
E participacion di Nyenrode Business Universiteit den e programa aki di Leadership Academy a duna un elemento adicional cu tabata specialmente valioso pa managernan cu ja caba a participa den diferente ‘training programs’. Hunto cu e universidad aki, a ofrece calidad y materialnan actualisa y varia den e spectrum di liderazgo.
E Leadership Academy 3.0 a consisti di cuater workshops, cual dos a wordo facilita door di Grant Thornton Aruba y e otro dosnan a wordo facilita door di Nyenrode Business Universiteit, aki na Aruba. Den e prome workshop, Grant Thornton Aruba a comparti nan metodologia ariba e aspectonan di ‘Creative Leadership’. Despues tabata tin Sra. Annemieke Roobeek di Nyenrode Business Universiteit, na unda ela comparti su experiencia ariba e tereno di ‘Network Leadership’. Sr. Ruben Goedhoop, Director di AZV, a hiba su discurso ariba ‘Challenging Leadership’ den e di tres workshop, caminda ela presenta su “Challenging Leadership model”. Y por ultimo, sr. Bas Blekkingh di Nyenrode Business Universiteit a presenta ariba e tema di ‘Authentic Leadership’.
Grant Thornton Aruba ta sumamente orguyoso y contento cu e interes grandi cu tin pa e ‘Leadership Academy’, no solamente e cantidad di participante, pero tambe e diversidad di e grupo. Pa motibo di e interes grandi aki, Grant Thornton Aruba ta mirando diferente opcionan pa sigui cu e ‘Leadership Academy’ den 2019, pa asina sigui duna e ehecutivonan e oportunidad pa crece ariba nivel personal y profesional, cu e obhetivo pa sigui eleva liderazgo na Aruba.
Fin di communicado