Controlaria General den su rapport di investigacion riba cuentanan anual 2016 a indica cu e ta haci su investigacion riba 3 diferente aspecto cu ta 1. Legitimacion di e maneho financiero 2. Responsabilisacion di e presupuesto y 3. Optimalisacion di maneho financiero. Su control ta basa riba principionan di bon gobernacion, pues pa ARA su investigacion y pa instituto Parlamento, Doelmatigheid y e Rechtmatigheid di entrada y uzo di placa di pais Aruba ta importante. Ta importante pa e e gobernante traha den su cuadro di ley y no surpasa e placa presupuesta cu Parlamento a duna autorisacion pero tambe logra metanan di maneho proponi.
Aruba bao supervision di CAFT
Awe mas cu nunca ta importante pa logra un finansas publico balansa y sostenibel. Pakico?
Aña 2016 tawata un aña na unda pais Aruba tawata bou supervision di Colegio di Supervision financiero (CAFT) durante e aña completo. Esey cu desde aña 2015 Aruba conoce supervision financiero di CAFT unda e ley di LAFT a stipula esey. Prome cu esaki, tur otro gobierno cu a sinta nunca a yega na e margen cu mester pa mama Hulanda bin wak den Aruba su “cushina”! Particularmente mester remarca cu pa final di aña 2015, si observa e tabel, pais Aruba su debe na GDP tawata 81.3% segun CBA. Pues legalmente, mirando cu Parlamento ta duna un cuadro di ley cuanto placa gobierno mag di gasta y mas ainda CAFT tawata supervisando, toch e gobierno di AVP a surpasa e presupuesto 2016.
Parlamentario Setty Christiaans-Yarzagaray ta di opinion cu mester asumi reponsabilidad di Parlamento manera mester pa no solamente evita cu Aruba por bay den direccion di mas problema pero tambe pa mustra cu por draai e situacion aki bek si no tin bon hende cu bon intencion na timon di pais Aruba. Spera si cu nunca mas e gobierno di signatura berde yega bek na goberna paso resultadonan mes ta mustra kico nan a logra durante nan temporadanan di gobernacion.
Ilegitimidad
Controlaria General den su rapport “Onderzoek Jaarrekening” ta biasa cu “Het niet naleven van wettelijke bepaling wordt gemerkt als onrechtmatig”. Tambe ARA a señala cu apesar cu tin aspecto di maneho financiero cu desaroyo positivo, cu tin hopi procedura administrativo importante cu no a cumpli cune, specialmente pa loke ta trata gastonan presupuesta. ARA ta considera gastonan cu ta surpasa presupuesto aproba pa Parlamento como ilegitimo. ARA a bay asina leu di recomenda Parlamento pa cumpli cu su tarea di supervision.
Segun e Parlamentario si nos keda haci mesun cosnan na Aruba di bay di acuerdo cu cosnan cu nos sa cu no ta den cuadro legal y si nos keda acepta e situacion di deficitnan gigantesco cu a sosode den pasado of gastonan adicional sin aprobacion di Parlamento anto kere cu esakinan ta “normal”, nos ta keda haya mesun resultado. “Nos den parlamento mester cambia direccion na bienestar di Aruba y nos mester hacie #SinMiedo!”
Persecucion penalmente y civilmente
E Parlamentario su ponencia fuerte pa no aproba ademas e cuentanan anual 2016 ta cu durante un presentacion den Parlamento di institutonan manera Raad van Advies (RvA), ARA, Departamento di Finansas y CAD (Controlaria General), e Parlamentario a haci pregunta na RvA riba su cuenta anual 2013 na unda ta indica cu nan no por uni nan mes cu e ley di presupuesto supletorio di 2013. Esaki mirando cu e Minister di Infrastructura di e tempo ey a surpasa su presupuesto cu mas cu 150% y pa esey RvA a duna advies cu e Minister encuestion, sr. Sevinger, por a wordo persigui penalmente y civilmente (Strafrechtelijk y Civielrechtelijk). E Parlamentario a haci e pregunta e tempo ey dicon nunca a persigui e minister unda el a haya e contesta cu momento cu Parlamento a aproba e presupuesto supletorio, automaticamente e minister a haya un décharge di su responsabilidad.
Nos ta representantenan di Pueblo y nos sa cu pueblo ta verwacht pa si algo a bay robes, pa nos actua den nan nomber. Pa e motibonan aki Parlamentario Setty Christiaans-Yarzagaray ta pensa cu el a haci lo corecto y no por a aproba e cuenta anual di 2016.