Prome Minister Everlyn Wever-Croes y Ministernan di Gabinete Wever-Croes a invita e 5 hobennan landado di Crossing for Hope pa ricibi un homenahe na Bestuurskantoor. Tabata un momento hopi emotivo, y tur minister presente por a dirigi algun palabra na e hobennan.
“Boso a sacrifica hopi, hasta riesga boso bida, pa yuda un causa: mehora calidad di bida di esnan cu ta sufri di cancer. Esaki ta un acto hopi noble riba su mes. E hazaña cu boso a completa, a uni henter nos comunidad. Nos tur a resa pa boso, y nos tur a celebra cu boso ora boso a yega. E ta un hazaña hopi peligroso, y danki Dios tur cos a bay bon. Henter Aruba ta hopi orguyoso di boso, y ami ta especialmente hopi orguyoso di Wendy, cu ta e prome hende muher cu ta completa e hazaña aki. Boso ta ehempel cu ora bo kere den bo mes, ora bo ta determina y ora bo tin sosten di bo sernan keri, bo por logra tur cos den bida. Danki pa demostra esaki, y danki pa ta un inspiracion pa hopi, grandi y chikito”, tawata palabranan di encurashamento hopi emotive di Prome Minister Everlyn Wever-Croes.