Paradera – Diadomingo mainta durante cu mayoria hende tawata spera yegada di Sinter Klaas na waf, polisnan a drenta un cas pabou di un speel school situa na Paradera.
No ta mucho duidelijk kiko a pasa cu polisnan a drenta e cas. Paden nan ta haya un plantancion basta grandi di matanan di marihuana, segun nos a compronde hopi bon cuida.
Mesora a bay over na detene e habitante di e cas. E cas aki cu ta di Chines, antes elo a habri un tempo cortico como bar restaurant. Pero mirando cu elo no tawata tin papelnan na ordo a cera y nunca mas a funciona.
Despues di esey semper e cas ta cera, pero paden otro negoshi a lanta cabes.
Na e sitio nos a papia cu e bisiñanan, y segun nan no ta cos di awor cu e Chines cu ta un hoben ta bende droga.
Constantemente autonan ta yega y cumpra nan productonan y sigui bay.
Diadomingo mainta polis a score y ta detene e chines y net pa mala suerte un persona cu a bay chapi yerba pe. E persona aki cu ta local no tin nada di haci cu e incidente, esaki segun bisiñanan.
Agentenan a avisa departamento di Droga y algun agente a yega na e cas pa asina ey sigui atende cu e caso.
Por a miranan sali cu varios cos confisca.
Mester bisa cu ariba e mes un caminda di Paradera pa Shiribana, poco pabou di Subway tin un otro cas mas conoci cu esaki.
E cas aki manera nada hendenan ta yega baha for di auto bay paden y cumpra nan droga.
Na e cas aki no ta papia di marihuana, pero di piedra.
E cas aki ta conoci pa adictonan. Pero nada nada no ta wordo haci.
Spera cu pronto autoridad por drenta e cas, aki cu ta causa masha hopi molester pa bisiñanan.
