Home » REFERIENDO NA TURISMO STAY OVER DI JANUARI TE CU OCTOBER 2018: TURISMO PA ARUBA A AUMENTA CU 1.3% Y ENTRADA PA CAMBER DI HOTEL A AUMENTA CU 11.5%

REFERIENDO NA TURISMO STAY OVER DI JANUARI TE CU OCTOBER 2018: TURISMO PA ARUBA A AUMENTA CU 1.3% Y ENTRADA PA CAMBER DI HOTEL A AUMENTA CU 11.5%

by Admin
0 comment 49 views

 

 

ORANJESTAD – Aruba a yama bonbini na un total di 890.134 bishitante ‘stay-over’ durante e prome 10 luna di 2018. Esaki ta 1.3% (+11.194 turista) mas compara cu e mesun temporada pa 2017. Si exclui e bishitantenan di Venezuela, por mira un aumento di 6.3% (+50.336 turista) cual ta igual na un total di 800.794 bishitante pa nos isla. E cifranan ta indica crecemento den mercadonan clave pa Aruba, manera Merca, Canada, Colombia pero tambe Chile y Italia, entre otro. Pa october, Aruba a ricibi un total di 80.820 bishitante stay-over, cu ta 0.08% (-663 turista) menos compara cu e mesun luna aña pasa. Excluyendo bishitantenan di Venezuela, por mira cu esaki ta 3.1% (+2.331 turista) mas cu ta igual na 76.681 bishitante pa nos isla pa october 2018.

 

Turismo ‘stay-over’

Aruba ta wordo representa den tres diferente continente. Compara cu october aña pasa, pa 2018 e turismo procedente for di e continente Norte Americano a aumenta cu 3.7% (+2.005 turista/total 56.051 turista) y a trece 69.4% di total di turismo pa nos destinacion. Na october, Merca a aumenta cu 3.9% (+1.992 turista/total 53.158 turista) y Canada a aumenta cu 0.5% (+13 turista/total 2.893 turista) compara cu e mesun luna na 2017. Di januari pa october 2018, Norte America a trece 653.658 turista pa Aruba, cu ta un aumento di 7.1% (+43.564 turista).

 

E continente Latino Americano a baha cu 15.6% (-2.416 turista/total 13.080 turista) unda Venezuela a baha cu 42% (-2.994 turista/total 4.139 turista) compara cu october aña pasa. Colombia a aumenta cu 31.8% (+790 turista /total 3.276 turista) y Brazil a baha cu 21.4% (-301 turista/total 1.106 turista). Tambe nos por mira un aumento for di Chile cu 13.6% (+121 turista /total 1.010 turista). E continente di Latino America a trece 16.2% di e total di turismo pa luna di octoberna nos isla. Di januari pa october 2018, Latino America a trece 132.688 turista pa Aruba, cu ta 20% (-33.078 turista) menos compara cu e mesun temporada aña pasa.

 

Pa loke ta Europa por nota cu turismo a baha cu 4.4% (-380 turista/total 8.245 turista) compara cu e mesun luna di october aña pasa. Reinonan Uni a baha cu 59.1% (-1.423 turista/total 986 turista). Manera informa anteriormente door di e asina yama ‘BREXIT’ na Inglatera, TUI a haña nan mes obliga di cancela un di e dos charternan for di e destinacion aki, pa Aruba. Por mira cu e perdida di 7.500 asiento y e caida di e mercado di Reinonan Uni ta wordo compensa cu crecemento for di otro paisnan. Mayoria di esaki ta cu e di 7 vuelo adicional pa siman di KLM cu A.T.A. a logra confirma desde november aña pasa. Ademas, TUI Hulanda a subi nan cantidad di asiento pa Aruba pa asina A.T.A. Europa ta keda contribui na crecemento di turismo di calidad pa nos destinacion.

For di otro paisnan Europeo; Hulanda a aumenta cu 19.2% (+600 turista/total 3.726 turista) y Alemania a aumenta cu 10.7% (+68 turista/total 703 turista). Ademas nos por mira un aumento for di Italia cu 8% (+55 turista/total 741 turista). E continente Europeo a representa 10.2% di turismo pa Aruba pa luna di october. Di januari pa october 2018, Europa a trece 73.690 turista pa Aruba, cu ta 2.4% menos (-1.818 turista) compara cu e mesun temporada aña pasa.

 

Turismo Crucero

Durante october 2018, 55.056 pasaheronan crucero a bishita nos destinacion riba un total di 22 diferente barconan crucero. Compara cu luna di october aña pasa, turismo crucero a aumenta cu 5.3% (+2.758 turista crucero): na october 2017 Aruba a haya 52.298 bishitante for di 25 crucero. Pues 3 barco crucero menos cu aña pasa.

Di januari pa october 2018, un total di 623.317 pasahero crucero a bishita Aruba (un aumento di 5.8% / + 33.931 pasahero mas) riba un total di 250 diferente crucero. Esaki ta mes hopi barco cu Aruba a ricibi durante e mesun temporada na aña 2017.

 

Tourism Receipts / Central Bank of Aruba

Di acuerdo cu Banco Central e asina yama ‘Tourism Receipts’, pa aña 2017 a contribui cu AWG 3.078.5 miyon den nos economia, cu ta un aumento di 6.5% compara cu e mesun temporada na 2016.

 

Hotelnan / AHATA

Segun Aruba Hotel and Tourism Association pa e luna di october 2018, e ‘Average Daily Rate’ (ADR) a aumenta cu 12% compara cu october 2017 Esaki den cifra ta US$ 192.52 na 2017 compara cu US$ 215.58 pa 2018. Di januari te cu october 2018, ADR a subi cu 12.2% y den cifra esaki ta US$ 243.05. E entrada pa camber disponibel, e asina yama RevPAR a aumenta cu 3.9% di US$ 164.29 na october 2017 pa US$ 170.66 na october 2018. Pa e prome 10 luna di 2018 RevPAR a aumenta cu 11.5% – US$ 206.34.

E anochinan ocupa (ORN) pa camber a baha cu 6% pa october 2018. Pa e prome 10 luna di 2018 ORN a baha cu 0.4%.

 

E prome 4 luna di 2018 e cifranan di AHATA ta basa riba 14 propiedadnan incluyendo Holiday Inn Resort y mayoria di e hotelnan cu excepcion di Hilton Aruba Caribbean Resort & Casino. For di mei 2018 e cifranan ta basa riba 13 propiedad – excluyendo Holiday Inn Resort. For di augustus 2018, e cifranan ta basa riba 15 propiedad, incluyendo Boardwalk Hotel y Brickell Bay Beach Club.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio