Diahuebs ultimo mi tabatin e honor di a asisti na e actividad di gradicimento cu Ministerio di Labor y Asuntonan Social a organisa pa tur esnan cu a aporta na Joepie Camp 2018. E Camp Nacional a ser organisa pa Minister Glenbert Croes bou coordinacion di e duo dinamico Darlaine Erasmus y Rochi Geerman. Dos persona cu a traha duro y di curason.
Na e camp Nacional a participa mayoria di e Centronan di Bario. Tabata un siman di alegria, wega, informacion y pa nos muchanan por explora. Un siman pa cera amistadnan nobo y pa bida. Un siman caminda un biaha mas un grupo di boluntario a aporta grandemente na desaroyo di e muchanan di nan districto.
Pa e motibo aki mes mi ta aplaudi e iniciativa di Minister y e coordinadornan pa organisa un anochi di gradicimento caminda a duna un booklet di potret como recuerdo na cada organisacion y alabes un regalito na tur presente. Alabes mi mester gradici Staff y personal di Casa Del Mar pa nan aporte pa haci e anochi aki posibel.
Trabou boluntario ta di suma importancia pa diferente veld aki na Aruba. Nos veld social, cultural y deportivo sigur no por sin nan nucleo di boluntario.
Durante e anochi mi tabatin oportunidad pa hiba palabra y mas cu claro loke mas mi a accentua ta e gratitud cu mi tin pa cada un di e boluntarionan cu ta traha di curason
pa un causa. E sonrisa di e muchanan durante e Camp ta e recompensa di mas grandi pa nos trabounan boluntario.