Diasabra anochi, Aruba a uni cu Xander den un celebracion bunita na unda cu nos pueblo a demostra nos orguyo nacional e admiracion y gradicimento pa loke el a haci pa nos isla internacionalmente. Xander Bogaerts cu su esfuersonan y e amor cu e tin pa su isla, a pone nomber di Aruba un biaha mas briya mundialmente cu su logro cu su di 2 titulo di Campion Mundial.
Gobierno di Aruba a honra Xander Bogaerts como emhador di bon boluntad pa nos pais. Hunto cu pueblo di Aruba a celebra esaki na grandi diasabra anochi den Carnival Village na San Nicolas. Ministernan di Gabinete Wever-Croes a hiba palabranan di elogio na nos gran orguyo nacional gradiciendo e den nomber di nos pueblo.
Diferente grupo di baseball a bin uniforma pa saluda Xander kende tambe a tuma su tempo pa saluda nan. Hopi mucha tambe a yega pa saluda nan heroe di baseball. Un demostracion di humildad cu e hoben beisbolista tin kende tambe como mucha, manera tur e muchanan cu a bin salude, tawata tin e soño di yega asina leu den e deporte.
Prome Minister Evelyn Wever-Croes, pa motibo di kebrante di salud, no por tawata presente hunto cu Xander den e celebracion aki, pero el a expresa su satisfaccion y alegria pa wak asina tanto hende acudi na e evento pa asina duna honor na Xander Bogaerts.
“Xander Bogaerts ta un hoben cu ta inspira nos hoben y adultonan. Un hoben cu apesar di su logronan grandi, a sa di keda humilde di curason. Nos pueblo a uni cu Xander den un celebracion grandi. Danki Xander, pa pone Aruba den bista di mundo un biaha mas. Bo esfuerso ta un logro pa Aruba tambe”, Prome Minister a expresa.
