Home Politics Minister Dangui Oduber: Gobierno a firma un convenio cu Corporacion “Con Animo”...

Minister Dangui Oduber: Gobierno a firma un convenio cu Corporacion “Con Animo” cu sede na Colombia

 

ORANJESTAD (AAN) — Ademas di a firma un MOU cu Mental Health Caribbean, Minister di Salubridad Publico sr. Dangui Oduber, a duna di conoce cu gobierno a firma un convenio cu Corporacion “Con Animo” na Colombia.

Actualmente e maneho di Salubridad Publico hopi biaha ta pa manda pacientnan Arubiano cu no por haya cuido aki mes, na e Instituto “Con Animo” na Colombia. E intencion di e director di “Cu Animo” ora el bishita Aruba ta, pa bin cu un centro na Aruba mes y esaki sigur gobierno di Aruba ta tuma cu man habri, asina e mandatario a trece dilanti.

Fuera di esey gobierno ta bezig pa habri un localidad pa adictonan ambulante por haya un lugar pa baña y cuminda tres bez pa dia. E localidad ainda no ta defini, y e ta wordo discuti na e momentonan aki.  Cu otro palabra, gobierno ta haciendo su maximo esfuerzo y tur loke ta necesario pa atende cu e problema serio aki, cu ta afecta nos comunidad henter.

E mandatario a expresa cu e ta spera cu tur e esfuerzonan aki duna un bon resultado pasobra esaki ta un situacion hopi serio cu pa ocho aña sigur a wordo neglisha y lubida. E ta trece cune problemanan social grandi den nos comunidad, y gobierno ta bay atende cune pa trece un alivio grandi pa e pacient mes, su famia ya cu e ta ocasiona hopi dolor den e famianan, y den comunidad. Minister Dangui Oduber ta sigi cumpli cu promesanan di gobernacion y campaña poniendo e ser humano central den tur momento.