Nos dushi Papiamento cu ta e fundeshi di nos identidad y nos cultura!
E anochi di prome di november, Parlamento di Aruba a aproba e ley di Ortografia di Papiamento. E buki blauw, manera e ta conoci den nos comunidad, pa varios aña caba, ta wordo uza entre otro pa maestronan, studiantenan, miembronan di prensa pa asina skirbi corectamente nos Papiamento.
Despues di varios aña di uzo di Papiamento, Parlamento a formalisa y legalisa e buki blauw. Cu esaki Aruba tin ortografia y vocabolario di Papiamento revisa y amplia.
“Como Minister di Enseñansa, mi ta sumamente contento cu nos a yega na e punto culminante aki den e aña di Papiamento, despues di a keda mas di 10 aña pendiente pa wordo formalisa”, Minister Armando Rudy Lampe a expresa.
Minister Lampe a gradici Parlamento cu a mustra union den e proceso pa formalisa nos dushi Papiamento. Un reunion publico cu a bay den hopi bon ambiente y positivo pa defende nos Papiamento.
Minister Lampe a gradici tambe e fundacion Lanta Papiamento cu ta e motor tras di henter e desaroyo di Papiamento den nos comunidad y e expertonan cu ta forma parti na e fundacion aki kendenan a duna nan contribucion. E mandatario a gradici tambe Departamento di Enseñansa cu a traha hopi duro riba e Proyecto aki.
“Di awo pa futuro ta keda na cada ciudadano di nos pais pa cuida nos dushi Papiamento pa cua motibo tambe, Gobierno a dicidi di introduci e scol Arubano multilengual. E procesonan ta canando bon y na februari proximo lo tuma luga un conferencia tocante e scol multilengual na unda cu Papiamento lo bira e lenga di instruccion den nos sistema di enseñansa primario.
Mi ta invita e comunidad Arubano pa nos aprecia nos dushi Papiamento cu ta e fundeshi di nos identidad y nos cultura”, Minister Armando Lampe a expresa.