Dialuna atardi Minister di Turismo, Salubridad Publico y Deporte Sr. Dangui Oduber a ricibi e 5 landadonan hunto cu nan coach Sr Roly Bisslik di Aruba Dolphins den Cocolishi
2 aña pasa Sra. Gwendolin Kock, Sr. Stephen Thijsen, Sr. Romar Arends, Sr. Davy Bisslik y Sr. Deaxo Croes a cuminsa cu training intensivo pa Crusa e lama bruto entre Aruba y Venezuela. E initiativa aki ta carga e nomber di “crossing for hope” y e atletanan lo ta saliendo di Piedras Negras, Falcon Venezuela dia 11 di November binidero. E meta principal di “crossing for hope” ta pa recauda fondo pa e Fundacion Reina Wilhelmina Fonds Aruba. E hazaña aki lo ta di 30 km y lo dura entre 9 pa 12 ora. Total lo tin 50 persona yudando e landadonan aki durante e hazaña.
Tabata 30 aña pasa cu Sr. Roly Bisslik a haci e hazaña aki pa recauda fondo pa cumpra un tereno pa traha locual awe ta nos picina olimpico na Savaneta.
Minister Dangui Oduber ta desea e balente landadonan aki tur clase di exito cu e hazaña aki. E atletanan aki sigur ta un inspiracion y motivacion pa comunidad, specialmente pa loke nan ta bai haci pa e bon causa. E ta un iniciativa sigur di aplaudi y ta carga sosten completo di gobierno di Aruba. Tambe e Minister ta haci un yamada na pueblo di Aruba pa haci un contribucion na Fundacion Reina Wilhelmina Fonds Aruba y forma parti di “crossing for hope”. Hunto nos por haci e diferencia.