Diabierna mainta na Sint Maarten, a tuma luga e di dos cumbre entre e Prome Ministernan di Aruba, Corsou y Sint Maarten. Prome Minister Eugene Rhuggenaath di Corsou, Prome Minister Leona Marlin di Sint Maartin y Prome Mininster di Aruba, Evelyn Wever-Croes.
Den e cumbra aki yega na palabracionnan hopi interesante y productivo pa e paisnan en cuestion. A dicidi pa institucionalisa e encuentronan di cooperacion a traves di un acuerdo cu lo wordo firma na Aruba den e proximo encuentro trilateral entre e Prome Ministernan.
Den e encuentro aki a trata e leynan en comun cu por traha hunto riba nan teniendo cuenta e sistemanan di ley di cada pais. E tema di integridad tambe wordo trata na unda cu Prome Minister Evelyn Wever-Croes a duna un resumen di tur locual Aruba ta haciendo riba e tereno aki, mencionando tambe e Bureau di Integridad cu a wordo institui prome di october ultimo cu a duna paso tambe pa e prome conferencia di Integridad na Aruba. Tambe a menciona tur e trabounan cu Gobierno ta haciendo pa yega na e Camara di Integridad. Esakinan tur ta cu e meta pa cumpli cu e tratado anti corupcion y pa firma esaki mas pronto cu ta posibel.
Prome Minister a indica tambe cu Aruba kier traha riba e nivel di integridad di e companianan di Gobierno tambe na unda lo introduci e Corporate Governance Code pa asina tin reglanan di integridad den nos companianan estatal tambe.
Varios otro tema a haya atencion durante e reunion trilateral entre otro; e Crisis Plan Social na unda cu Prome Minister di Aruba a splica e maneho cu Gobierno ta hibando riba e tereno aki tambe;
Pensionadonan di SVB di Corsou kende nan pensioen a wordo corta y a perde e bonus. Prome Minister a pidi Prome Minister di Corsou pa pone atencion na e problema aki pa nos pensionadonan kende na su turno a priminti cu e lo bay trece esaki un biaha mas den su gobernacion y den e siguiente encuentro lo bolbe trata e punto aki;
E tema di migracion tambe a wordo treci mirando cu tur e paisnan Aruba, Corsou y Sint Maarten ta wordo poni bou precion debi na e situacion di migracion. Deliberacion riba e tema aki a dura basta largo y a yega na un convenio pa encarga Social Economische Raad, SER di Aruba, Corsou y Sint Maarten pa prepara un conseho pa e gobiernonan con ta e miho manera pa trata cu e problematica di migracion.
Prome Minister Evelyn Wever-Croes: “E tawata un cumbre hopi exitoso y productivo na unda hopi informacion a wordo comparti. Especialmente, e cumbre a wordo dirigi riba mas cooperacion pa traha hunto. Esaki no kiermeen cu nos ta perde nos autonomia. Ora nos traha hunto, ta mas fuerte so nos ta bira”.