Den e programa di gobernacion di Gabinete Wever-Croes, tin poni cu e ser humano ta central. Un ser humano, un empleado cu ta pasa gran parti di su bida na pia di trabou, ta central. Den e cuadro aki, Gobierno di Aruba ta pone central tambe e material di trabou pa haci e trabou mas eficiente y mas optimal posibel. Gobierno di Aruba, durante 11 luna di gobernacion, a percura pa provee materialnan di trabou na e departamentonan concerni.
Diabierna atardi, Minister di Husticia señor Andin Bikker cu hopi honor y placer den nomber di pais Aruba, a haci entrega di 8 auto nobo na e Instituto Coreccional di Aruba, KIA.
Na e ocacion, representante di KIA señor Quant kende simbolicamente a tuma e yabi di un di e autonan for di man di Minister Bikker. Señor Quant a duna di conoce cu KIA tawata tin solamente 4 auto cu cuanan nan tawata lucha pa basta tempo. Y awo cu e 8 autonan extra, KIA sigur por haci miho servicio. Señor Quant a gradici Minister Bikker y Gobierno di Aruba pa esaki.
“Gabinete Wever-Croes ta percura pa semper tin matrial di trabou pa optimalisa y pa asina e trabou por wordo haci mas efectivamente. E autonan ta e comienso y sigur lo tin mas material na caminda y asina e empleadonan di KIA y henter e Instituto Coreccional ta keda central cu ta e meta di nos gobierno”, Minister Bikker a duna di conoce.