Ta importante pa nos proteha y salvaguardia nos idioma Papiamento
ORANJESTAD – Na ocasion di 15 aña di Papiamento como idioma oficial e Plataforma Union di Papiamento consistiendo di Fundacion Lanta Papiamento di Aruba, Fundashon Instituto Alsa Papiamentu di Kòrsou, Fundashon Akademia Papiamentu di Boneiro y Fundashon SPLIKA di Hulanda ta organisa Conferencia Papiamento Idioma Oficial caminda lo pone atencion riba Papiamento pa asina aporta na su desaroyo. Meta di Plataforma Union di Papiamento ta pa traha hunto pa promove, enforsa y desaroya nos dushi idioma Papiamento.
Minister di Finansa, Asuntonan Economico y Cultura Sra. Mr. Xiomara Ruiz-Maduro ta invita cpa dirigi palabra caminda elo elabora riba Papiamento y Cultura. Papiamento tin un status oficial na Aruba, Boneiro y Kòrsou. Na 2018 nos ta celebra cu na Aruba ya ta 15 aña cu Papiamento tin un status oficial y e aña aki a wordo proclama como “Aña di Papiamento”.
E meta di e simpioso aki ta pa enfoca riba e atencion amplio pa cuido di Papiamento, sosten pa realisa un Union di Idioma Papiamento, cu Plataforma cu organo di deliberacion y sosten pa introduccion di Papiamento como idioma di instruccion den enseñansa. E conferencia lo tuma lugar diabierna 26 di october y diasabra 27 di october na Biblioteca Nacional Aruba. Minister Ruiz-Maduro ta un ferviente sostenedor di nos idioma Papiamento y ta convenci cu pa medio di conferencianan manera esaki, nos comunidadnan cu ta papia Papiamento, por sigui proteha y salvaguardia nos dushi idioma Papiamento, como un di e idiomanan crioyo mundialmente mas desaroya.