NOS MUCHANAN MESTER TA CENTRAL PA NOS TUR
Den e cadena di abuso infantil, nos ta reconoce algun punto importante cu ta rekeri atencion inmediato. Den su discurso na e congreso ‘Break the Silence’ diasabra ultimo, Prome Minister Evelyn Wever-Croes a comparti algun punto prinicipal pa demostra con importante ta pa reconoce e señalnan di abuso infantil na tempo.
Comunidad ta pidi prome cu tur cos, pa preveni abuso infantil. Y si esaki no ta e caso, e victima y su famia mester wordo trata mas lihe posibel. Comunidad di Aruba ta desea castigo mas pisa pa e abusadornan di mucha. Pero ta hunto nos mester preveni, evita y elimina e problema aki. Nos ta e cuidadornan di nos muchanan. Nan ta conta riba nos proteccion.
- Prevencion di abuso infantil por wordo logra door di aumenta conscientisacion. Gobierno pronto lo cuminsa cu campañanan di conscientisacion pa tur mayor comprende cu abuso di mucha no ta aceptabel.
- Victimanan di abuso por wordo yuda mas lihe y efectivo door di: deteccion na tempo; semper ta alerta; mas colaboracion di comunidad; y door di encuentronan manera congreso y of conferencianan riba e tema aki.
- Con Aruba por implementa castigo mas pisa pa e abusadornan di menor. Na prome luga, mester determina na tempo y lihe e abuso di menor. Depues, door di un procedura di investigacion eficiente y lihe di husticia pa asina hues por obtene den un periodo relativamente cortico un archivo completo di e caso. Tambe, nos leynan mester wordo ahusta pa garantisa castigo halto pa asina nos mira castigonan mas pisa pa e casonan cruel aki. Castigo halto pa e abusador sinembargo, no ta e meta riba su mes. Castigo halto mester tin como meta pa obtene un efecto preventivo y curativo. E abusador tambe mester wordo yuda durante su castigo halto pa asina preveni recidivismo. Esaki por solamente si e malechor keda cera pa un tempo largo. Pero si su castigo ta cortico, e no por wordo trata y yuda y e lo bolbe den comunidad y lo ripiti e actonan cruel aki.
Ainda nos no ta unda nos mester ta. Ta pesey, e maneho di Gabinete Wever-Croes ta concentra riba e siguiente puntonan:
- intensifica e proceso di conscientisacion door di mas campañanan
- instala un ‘meldcode’ na unda por raporta casonan di abuso
- implementa cambionan den nos leynan pa apoya e procesonan aki, incluyendo confidencialidad di profesionalnan medico.
- introduci un sistema apropia pa cuido di mucha
- inverti den nos profesionalnan medico y social, kendenan ta e capital humano involucra den e bienestar di nos muchanan y nan famia.
Pa Gabinete Wever-Croes, ta importante pa e comunidad comprende cu deteccion di e prome señal di abuso di menor ta importante, no solamente pa yuda e victima y e famia of pa evita cu e victima bira un abusador despues, sino tambe pa yuda den e implementacion di castigonan mas halto for di cua por sali efectonan preventivo.
“Ainda nos no ta unda nos mester ta, pero mi ta asegura Aruba cu Gobierno aki no ta keda sinta warda te ora un otro victima infantil wordo abusa y wordo ranca di bida pa e ora nos haci algo. Nos ta den e momento pa actua y grita cu forsa uni: NO MAS! Laga nos kibra e silencio awo. E lucha aki ta di nos tur. Di Gobierno y di pueblo henter. Y e lucha no ta facil. Pero hunto nos ta logra yuda drecha bida di victimanan di abuso y nan famia. Laga nos sigui trece lus den futuro di nos muchanan cu a wordo daña door di abuso y pusha e sombranan scur leu for di nan” ta e palabranan cu Prome Minister Evelyn Wever-Croes a conclui su discurso den congreso ‘Break the Silence’.