Nos tawatin un siman di dushi bendicion di awa cero cu a trece aire fresco pa nos. Pa Gabinete Wever-Croes, e siman tras di lomba tambe a trece aire fresco pa nos pueblo. Nos a realisa logronan importante pa bienestar di nos pais. Prome Minister Evelyn Wever-Croes a enfatisa cu e meta di Gobierno di Aruba ta pa crea un miho Aruba pa tur ciudadano na Aruba.
CAFT: A Publico su conseho riba Presupuesto 2019 cu ta hopi positivo pa nos Gobierno. CAFT a indica cu Gobierno di Aruba te tene cuenta cu proyeccionnan economico realistico y tambe cu nos ta cumpli cu e palabracionnan haci riba e deficit nobo di nos pais. Nos no ta unda nos mester ta ainda. CAFT a duna recomendacionnan pa cierto cambionan y of pa tene cuenta cu e cambionan aki pa recomendacionnan pa futuro. Esaki ta duna Gobierno satisfaccion y trankilidad pa sigui gobierna.
REFORMA FISCAL: Trabounan ta continua pa nos yega na un sistema di Impuesto mas husto y simpel y cu ta trece placa den caha di Gobierno. Den e Masterclass di Raad van Advies riba e tema di impuesto, a bin sugerencianan cu lo forma base di e Reforma Fiscal.
IMF: E Raport di IMF ta den su fase final y una bes cu e raport wordo finalisa, Gobierno lo publica esaki pa informa Aruba riba e recomendacionnan di IMF.
OECD: Aruba no ta bay aparece riba e lista preto di OECD. OECD tawatin e intencion pa pone Aruba riba ‘blacklist’ pasobra nos no tawata den cumplimento cu reglanan. Pero nos Minister di Finansa a atende cu e problema aki cu e resultado cu awe nos por bisa cu hopi orguyo cu Aruba ta cumpli den gran parti cu tur e reglanan y a obtene un rating positivo.
BUREAU INTEGRITEIT: Nos a pone e prome paso concreto pa e Bureau Integriteit y a nombra sra. Amalin Flanegin pa set up e bureau.
CONFERENCIA DI INTEGRIDAD: Gabinete Wever-Croes a skirbi un capitulo nobo den historia di nos pais: E capitulo di integridad. Cu e prome conferencia pa hefenan y hefenan suplemente di departamentonan di gobierno y nan funcionarionan cu ta traha den recurso humano. No por ta lider sin integridad. Di e manera aki, nos ta cuminsa caminda nos mester cuminsa. Cerca e Ministernan prome y ta sigui cu hefenan di departamentonan.
REUNION DEN PARLAMENTO: Lo bay mira cambionan den e maneho di companianan estatal. Lo maneha cu integridad na unda companianan estatal tambe lo sinti e cambio aki. Un cambio ta e salario di e directornan di e companianan estatal. Lo pone un maximo di loke un director por gana. E plan aki a haya sosten di tur Parlamentario presente. Ainda ta delibera con ta bay regla esaki den ley.
SIGURIDAD: A aresta un grupo grandi di sospechosonan kendenan tawata percura pa casonan di ladronicia ultimo temponan. Pa trece un maneho balancia, Gobierno a dicidi di cambia orarionan di ciere di clubnan nocturno. Tambe Minister di Husticia a anuncia un maneho nobo pa atrae inversionistanan, economia y personanan pa traha riba e tereno di innovacion.
ENSEÑANSA: Recien Minister encarga cu Enseñansa, Armando Rudy Lampe a anuncia un proyecto cual e Minister a considera di ta esun mas importante di e decada di enseñansa na Aruba. Ta trata aki di e Proyecto PEN, Plan Educacion Nacional 2018-2030. Gabinete Wever-Croes ta den concordancia cu e Metanan di Desaroyo Sostenibel (SDGs) di Unesco acorda pa huminidad henter pa yega 2030 cu resultadonan favorabel. E meta number 4 di SDGs ta Calidad di Enseñansa. Ora nos ta papia di hisa calidad di enseñansa como meta hunto cu Unesco y tur pais na mundo, a acorda cu esaki ta fundamental pa futuro di nos muchanan.
BUS SCOL DUNUN MAN: Scol Dunun Man a ricibi un bus danki na donacionnan y na un areglo special di impuesto di Gobierno di Aruba. Pa Gabinete Wever-Croes e meta ta pa yega na inclusion completo pa nos muchanan special y pa tin mas oportunidad pa nan riba e tereno di enseñansa y laboral y wordo inclui den nos comunidad.
DEPORTE: Minister di Deporte a cuminsa cu un campaña di conscientisacion pa stimula nos mucha y hobennan pa haci mas deporte y destrai nan mes na un forma sano y saludabel.
APP PA CELLULAR: Gabinete Wever-Croes di e forma aki ta manete tur actividad, proyecto, noticia, potret, hunto den un solo App. Por baha e App ‘Gobierno di Aruba’ via App Store y Google Play.
ISLAONLINE: Ta e corant digital di Gobierno di Aruba cu e comunicadonan di e ministernan di Gabinete Wever-Croes manera cu nan ta wordo manda prensanan local.
“Esakinan ta algun di e pasonan firme y determina pa crea un miho futuro pa tur ciudadano, y apesar con facil e ta pa cay den discusion cu ex gobernantenan, nos no ta laga nada desvia nos. Nos sa cu nan a laga e pais den decadencia atras, varios instancia independiente a confirma esey. Nan mes a admiti con malo nan a laga e pais atras un aña pasa. Nos meta ta crea un miho Aruba pa abo y pa tur ciudadano. Mi tin tur confiansa cu nos lo logra. Un fuerte abraso”, tawata palabranan di Prome Minister Evelyn Wever-Croes.