San Nicolas: Diamars anochi den e tiramento fatal, e persona cu a fayece den e tiramento ta Harmon Girigorie, un persona conoci den e districto di San Nicolas.
Segun un testigo na Julio’s nan a mira dos persona ta core tras di otro, un a saca arma y a tira Harmon Girigorie den su zij.
Harmon a core bay su cas, cu ta keda den e caya patras di Julio’s y den entrada di e cas ela cay.
Mesora a pidi pa presencia di Ambulance y polis cu hopi urgencia. Na yegada di ambulance ya e victima no tabata duna señal di bida mas y no a keda nada otro pa pidi un Dokter pa bin na e sitio.
Polis a cera e area di delito pa mesora cuminsa haci mas investigacion. Polis Tecnico a presenta ta na e sitio y ta haciendo investigacion na e sitio di delito y tambe riba e auto di e victima.
Pa 8’or y 50, Dokter Britt Croes a bin constata morto di Harmon Girigorie, naci na Aruba, dia 21 di December 1985.
Harmon Girigorie ta un persona cu na bida tabata traha na e bureau di Minister Chris Romero. Harmon tabata un amigo y campañador di Minister Chris Romero, un persona hopi keri den e bario di San Nicolas. E morto di Harmon a shock hopi hende.
Alto Comisario Ho y tambe varios unidad di polis a presenta na e sitio.
Arubanative.com kier a extende su mas profundo palabranan di condolencia na famia y amigonan di Harmon Girigorie, cu Harmon sosega na paz.